Tubacex enpresak jakinarazi duenez, merkatuko tokia hobetzen ari da azken urteotan egindako estrategia aldaketari esker. Horren ondorioz, aurtengo lehen 3 hilabeteek nabarmen gainditu dituzte 2017ko emaitzak. Izan ere, 168,5 milioi euroko salmentak izan dituzte, iaz baino %28,3 gehiago.
Hori dela medio EBIDTA -etekin kopurua gastu finantzarioak ordaindu baino lehen- 15,8 milioi eurokoa da. Horrekin, iazko datuak %21 gailendu dituzte.
Ekoizpen egitura
Gauzatu dituzten aldaketen artean, garrantzitsuena da Indiara bideratu dutela hodi arrunten ekoizpena. Horrela, Europan produzitzen dira balio gehigarria dutenak.
Horrez gain, Estatu Batuetako faktoriak indartu dituzte inbertsioen bidez, Donald Trumpen gobernuak zergak igotzekotan, arazoak ekiditeko.
263,1 milioi euroko zerga finantzarioa
Enpresak adierazi duenez, zerga finantzarioa 263,1 milioi eurokoa izan arren, hurrengo 3 urteko ordainketei aurre egiteko bitartekoak dituzte.
Zorrak zerikusia du stockean dituzten eskaerekin, 60 milioikoak baitira. Hala ere, "oso errentagarriak" izango direla ziurtatu du taldeak. Berez, hurrengo hilabeteetan stock horiek saltzea espero dute.
Tubacexen jarduera gehiena, %47, alegia, gas eta petrolioaren ustiapenera bideratuta dago. %17 elektrizitatea sortzeko merkatuan erabiltzen da. Ildo beretik, Txinako petrolio-findegi baten eskaera ere nabarmendu dute.
Gatazka eskualdean
Emaitza on horiek bat egin dute Aiaraldean langileen eta zuzendaritzaren artean dauden tirabirekin. Izan ere, apirilean grebak deitu zituzten beharginen batzarrak aurreakordioa atzera bota eta gero.
