Ramiro Gonzalezek bere proposamenak ekarri zituen Aiaraldeko lurraldera asteartean eta asteazkenean. Hasteko, asteartean industria politikak izan zituen hizpide. Egungo Ahaldun Nagusiak Laudion hartu zuen hitza azaltzeko datorren legealdiari begira espazio berria sortu nahi dutela: Aiara Industrial LAB.
Foro horren asmoa izango da hausnarketa eta partaidetza eragiteko gunea eratzea, eskualdeko garapen ekonomikoari lagunduko dioten lankidetza publiko-pribatuko proiektuak abiarazteko helburuarekin.
Tokiko enpresak, Merkataritza Ganbera, SEA, Arabako Enpresariak, BIC Araba, Tecnalia eta Kuadrillako prestakuntza-zentroak gonbidatu nahi dituzte horretarako, sinergiak sortzeko.
Horrez gain, asteazkenean Gonzalezek agerraldia egin zuen Arespalditzako San Isidro azokan. Lehen sektorearen omenezko jai horretan jarduera ekonomiko horri buruzko proposamenak plazaratu zituen: “Nekazaritzako elikagaien sektorean aldaketak egitea proposatzen dugu, teknologia berriak bidelagun, landa-eremuan industria modernizatzeko. Birgaitze Plana sustatuko dugu etxebizitza narriatuetan esku hartzeko. Eta landa-eremuan garapen iraunkorraren eta pertsonen ongizatearen arloetan teknologia eta konektagarritasunaren erabileraren sustapenean aurrera egiten jarraituko dugu”.
Bestalde, Ahaldun Nagusiak iragarri zuen laguntza-tresnak jarriko dituztela mendekotasuna duten pertsonen zaintzaile ez-profesionalen eskura, landa-eremuan indar berezia eginez, pertsona horien arretaren kalitatea hobetu dadin eta beharrezko atsedena bermatuta eduki dezaten.