Arimen Gaua ospatzeko kanta sortu dute Aiaraldea Ekintzen Faktoriak eta Kokorikok

Igon Olaguenaga trikitilaria arduratu da musika konposatzeaz eta Aiala eta Okher artistek jarri dute ahotsa.

Arimen gauaren ohitura berreskuratzeko lehen saiakera egin zuen Kokoriko Hezkuntza Faktoriak iaz.  Unitate didaktiko bat egin eta eskualdeko ikastetxe guztiei banatu zieten, Estatu Batuetatik inportatutako Halloween-en "olatu kontsumistari" aurre egiteko.

Aurten pauso bat harago joan nahi izan dute hezkuntza faktoriako kideek. Grabaketa estudioan sartu dira horretarako, arimen gauaren abestia osatzeko. Igon Olaguenaga trikitilaria arduratu da musika konposatzeaz, eta Izar Mendiguren bertsolariak egin ditu letraren estrofak. “Hala ere, letra ez dugu guk asmatu”, argitu dute Kokorikoko kideek, “historikoki kokatua dagoen letra da.  Kantu eskerako erabiltzen zen esaldia hartu dugu estribillo moduan baliatzeko”. Egunotan grabatzen ari dira abestia. Okher eta  Aiala artistek jarri dute ahotsa, hainbat haurrekin batera: Aitzol Goikoetxea, Ilune Urruela, Irune Urkixo, Hur Mendiguren eta Hegoa Fernandez.


ABESTIAREN LETRA

Xanduli manduli kirrikiki
Eman jatekoa guri
Txingila mingila kurruskario
Sagarrak merke ta Udareak karioo!!

Gauak duen arima ez da beti berdina
Sortu dezagun gure kantu edo ipuina
Kalabazaren jolasak irri ta kilikili
Saguzaharren artean hegan pozik ibili!

Izararen atzean, lagun denak atean
Eguzkilore,Urre… usatzeko beldurra!
Negua jakiz bero behar dugunez gero
Eskean ta zirika gabiltza egunero.

Xanduli manduli kirrikiki….

Kandelak piztu eta bagoaz ttipi-ttapa
Izua ez da sua, nahiz bihotza taupaka
Txirrinak jo du oihu bat, katua miauka!
Gauak beldurtu baino, liluratuta nauka!

Arimen gauak dauzka 11 istorio
Saskiak betetzeko festa zein usadio!
Guk kontatu dizugu esames, historia….
Orain zuk erabaki sari edo ziria!!

Xanduli manduli kirrikiki…

 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide