Apirilaren 2tik aurrera, Covid-19ko pandemiaren zabalpena moteltzen hasi da Aiaraldean: egun bakarrean kasuak 20tik 5era jaitsi ziren, eta apirilaren 8an erregistro historikora heldu ziren, herritar bakarra kutsatu baitzen Amurrion.
Atzo datu baikor hori errepikatu zen, eta koronabirus kasu berri bakarra jazo zen Laudion. Azken 5 eguneko markarik onena izan da. Izan ere, kutsatu berrien kopurua baretu bada ere, apirilaren 9an 2 gaixo gehiago topatu zituzten, apirilaren 10ean 3, eta apirilaren 11n eta 12an bosna egunero.
Eskualdeko kasuen bilakaera
Guztira 221 positibo sailkatu ditu Osakidetzak Aiaraldean; 83 Laudion, 65 Amurrion, 20 Urduñan eta Aiaran, 14 Orozkon, 9 Artziniegan eta 5 Okondon.
Eskualdeko jaitsiera EAEn gertatutakoarekin bat dator. Berez, jadanik 11.226 gaixo badaude ere (6.085 Bizkaian, 3.055 Araban eta 2.086 Gizpuzkoan) apirilaren 7tik aurrera egunero murriztu da kutsatu berrien kopurua. Apirilaren 7an 443 izan ziren, eta atzo 207. Hau da, %53,2 txikitu da eri kopurua. Hildakoei dagokienez, 859ra heldu zen atzo EAE, aurreko egunean baino 28 gehiago.
