Igandeko zoriontasunak, umeek aukera izan dutelako kalera ateratzeko tarte batez, ez du jarraipena izan atzoko estatistikei dagokienez Aiaraldean. Izan ere, hainbat egunez beherantzako joerarekin mantendu ostean, eskualdeak atzo 10 Covid-19 kasu berri erregistratu zituen.
EAEn 183 positibo berri detektatu zituen osasun sistema publikoak, hortaz, Aiaraldean horien %5,46 jazo zen. Gehienak Laudion izan ziren, 7. Horrela, Laudio 103 gaixora heldu da, eta erkidegoko 25. udalerririk kutsatuena da. Aintzat hartu behar da Bermeoko kopuru bera duela. Amurrion bi diagnosi gehiago egon ziren eta guztira 73 dira. Orozkon, aldiz, 18ra igo da zenbaketa. Eskualdean jadanik 259 kutsatu identifikatu dituzte ondorioz.
Pasa den larunbatean fenomeno bera gertatu zen atzokoan, eta beherako joerak gorakada izan zuen Urduñan aurkitutako 5 koronabirus kasuen ondorioz, nagusien egoitzan. Edonola ere, atzoko emaitzek aste osokoak gainditu dituzte aurreko eguneko diagnosien zenbaketa 9 izan baitzen.
EAEn kopuruen bilakaera positiboa da, egindako testen kopurua areagotu arren, kutsatuena ez baita handitu neurri berean, eta ostiralean 348 topatu eta gero, atzo bakarrik izan ziren 183. Halaber, 1.230era heldu da hildakoen kopurua, atzo 18 lagun zendu ziren.
