Osakidetzak kaleratu berri duen koronabirusari buruzko txostenean argitu du atzo 6 positibo identifikatu zituela Aiaraldean. Zifra horrekin bi egunez jarraian errepikatu da kopuru berbera, apirilaren 28an eta 29an gorakada izugarria gertatu eta gero -77 diagnosi 48 ordutan-.
Edonola ere, Roberto Gonzalez Santisteban Aiaran lan egiten duen medikuak azaldu bezala, kasu horiek zaharrak ziren eta positibo berriak egonkortu dira beste behin ere.
Berez, maiatzaren 1ean eta apirilaren 30ean jazotako diagnosiak oso antzekoak dira; Laudion 4 izan ziren eta Amurrion bat. Atzo, beste bat egon zen Artziniegan eta ostegunean, ordea, Urduñan izan zen.
Aste honetan aurkitutako kutsatu berriekin 349 dira gaixoak eskualdean; 123 Laudion, 99 Amurrion, 61 Aiaran, 29 Urduñan, 19 Orozkon, 12 Artziniegan eta 6 Okondon.
Azken egunetan EAEn test azkarrak eta PCR analisiak biderkatu ostean, atzo murriztu ziren erdira. Izan ere, apirilaren 30ean 11.000 baino gehiago egin ziren eta atzo ez ziren 6.000ra heldu.
Autonomia erkidegoan 16.119 dira kutsatuak guztira; 9.180 Bizkaian, 4.167 Araban eta 2.772 Gipuzkoan. Hildakoen kopurua 1.321 da, atzo baino 9 gehiago. Ospitalean dauden herritarrak 504 dira, aurreko eguneko baino 37 gutxiago, eta zaintza bereziak behar dituztenak, ordea, 91 -4 gutxiago-.
