Ostiralean 7 kutsatu topatu eta gero, atzo Osakidetzak 2 koronabirus positibo gehiago baino ez zuen detektatu. Bat Laudion izan zen eta udalerri horren kopurua 134 da, eta bestea Amurrion izan zen, non datua 105era heldu den.
Aste honetan, momentuz, 22 izan dira gaixo berriak, asteartean 6 izan ziren, asteazkenean 3, ostegunean 4, ostiralean 7 eta atzo 2. Astelehena kenduta, ez baitzuten positibo berririk aurkitu, atzokoa da markarik onena maiatzeko lehen aste osoari dagokionez.
Kasu gehienak eskualdeko udalerri populatuenetan jazo dira, Laudion 11 eta Amurrion 6, baina ostiralean 3 agertu ziren Orozkon. Beste bana Aiaran eta Urduñan izan ziren.
Gauzak horrela, Aiarak 62 positibo izan ditu pandemia hasi zenetik, Urduñak 30, Orozkok 22, Artziniegak 12 eta Okondok 6. Guztira, 371.
Maiatzaren 9an 3.139 herritarri egin zizkien testak Osakidetzak EAEn eta horietako 124 izan ziren positibo. Erkidegoan 17.677 kutsatu egon dira; 10.021 Bizkaian, 4.649 Araban eta 3.007 Gipuzkoan. Atzo 15 lagun gehiago zendu ziren eta hildakoen kopurua 1.418ra heldu da. Atzo 40 ospitaleratuk lortu zuten alta, baina oraindik 361 dira. 70 ZIUn daude, hau da, 2 gutxiago.
