Atzo indarrean sartu zen EAEn konfinamendua atzean uzteko 1. Fasea eta COVID-19ko positibo berri bakarra azaleratu zuen Osakidetzak Aiaraldean, Amurrion, hain zuzen.
Gauzak horrela, udalerri horrek 106 kutsatu erregistratu ditu pandemia osoan eta eskualdeak, guztira, 372 detektatu dira. Laudiok jarraitzen du izaten kopuruari dagokionez tokirik kutsatuena 134 gaixorekin eta, Amurrioz gain, hurrengoak dira zenbaketak: Aiarak 62 positibo izan ditu, Urduñak 30, Orozkok 22, Artziniegak 12 eta Okondok 6.
Pasa den astean 22 kasu berri besterik ez zuen detektatu osasun sistema publikoak Aiaraldean, aurrekoan 91 topatu ostean. Printzipioz, eskualdea deseskaladaren 1. Fasean dago eta atzo nabarmena izan zen hainbat herritan.
Esaterako, Laudion Ertzaintzak eta Udaltzaingoak Zubiko Kurajon irekirik zegoen taberna bakarrari jakinarazi zioten terrazan behar baino jende gehiago zuela eta hurrengoan isuna jarriko diotela.
EAEri dagokionez, 131 gaixo berri erregistratu zituzten eta 4.416 laguni egin zizkieten testak. Erkidegoan 17.840 dira osasun sistema publikoak aitortu dituen gaixoak; 10.119 Bizkaian, 4.710 Araban eta 3.011 Gipuzkoan. 364 herritar oraindik ospitalean daude, horietako 71 ZIUn. Atzo 6 pertsona gehiago hil ziren eta zendutakoen kopurua 1.429ra heldu da.
