Abuztuaren 24ak 9 gaixo berri utzi ditu eskualdean, koronabirusaren pandemia medio. Artziniegan jaso dira kasu gehien, 5 hain zuzen. Amurrion 3 lagun kutsatu dira, eta Arrankudiaga-Zollon bat. Azpimarratzekoa da, baina, lehenbiziko eria dela Arrankudiaga-Zollokoa. Horrenbestez, Arakaldo da gaur arte COVID-19 birusa baieztatzeko testetan positiborik plazaratu ez duen Aiaraldeko herri bakarra.
Asteburuko gorakada "etenda"
Asteburuan 13 kasu baieztatu ziren bailaran. Artziniegan agertu zen horietako bat, eta PCR frogak egin ostean, 5 positibo gehiago artatu behar izan ditu osasun sistema publikoak. Hargatik, udaletik birusaren hedapena gelditzeko maskara janzteko, distantzia gordetzeko eta eskuak ondo garbitzeko deia zabaldu dute :"Zaindu gaitezen, guztion artean lortuko dugu. Prebentzio neurriak betetzen baditugu ez daukagu zertaz kezkatu".
Laudion eta Amurrion azken egunetako goranzko joera eten da: asteburuan 5 eta 4 herritar gaixotu ziren herri horietan, hurrenez hurren. Orozkon, Aiaran eta Urduñan, berriz, kasu bana agertu ziren atzo plazaratutako asteburuko emaitzen txostenean, baina dirudienez ez da birusa gehiago hedatu herri horietan.
Gauzak horrela, herrika Aiaraldean pilatutako positiboen kopurua ondorengoa da pandemia hasi zenetik:
- Laudio: 223
- Amurrio: 148
- Aiara: 71
- Urduña: 50
- Okondo: 8
- Orozko: 30
- Artziniega: 27
- Arakaldo: 0
- Arrankudiaga-Zollo: 1
- Aiaraldea: 558
Bestalde, EAEri dagokionez, 477 positibo gehitu zaizkio koronabirusaren zerrendari. Atzoko egunez Araban 55 kasu berri agertu ziren, eta Bizkaian 271, orotara 5.669 PCR test egin zirelarik erkidegoan.