Mobilizazio egutegia prestatzen ari dira Tubacexeko Langile Batzordeko kideak zuzendaritzak ezarri nahi duen kaleratze kolektiboari aurre egiteko. Aurreratu dituzte dagoeneko lehen deialdiak: datorren astelehenean -otsailak 8- elkarretaratzea egingo dute 15:45tik aurrera Laudioko lantegiaren aurrean, 16:00etan bertan bilduko baitira zuzendaritzako kideak sindikatuekin.
Horrez gain, hilaren 11 eta 12an -osteguna eta ostirala- greba egingo dute langileek. Komiteko kideek jakinarazi dute protestak ez direla hor amaituko. “Mobilizazio egutegi bat prestatzen ari gara, asanbladetan aurkeztuko dena”. Sindikatuek datorren astean egingo dituzte bilerak afiliatuekin, Enpresa Batzordearen asmoen berri emateko.
Langileen ordezkariek argi utzi dute zein izango den mobilizazioen helburua: “Kaleratze bat bera ere ez egotea eta enpresak dituen arazoei neurri koiunturalekin aurre egitea”. Horretarako, langileen erantzuna “irmoa” izan behar dela defendatu dute.
Komitearen aburuz, zuzendaritzak osasun krisia baliatu nahi du langile klasea geroz eta gehiago pobretzeko eta “klaseen arteko arrakala” are handiagoa egiteko. “Albiste honek argi uzten du enpresako buruek poltsikoak gure kontura betetzeko duten grina. Oraingo honetan ez dira gure lan baldintzetan murrizketak planteatzera mugatzen. Ez dira kikiltzen, eta langileak kaleratzea planteatzen dute, gure inguruko familiak egoera dramatiko batean jarriz”.
Batzordeko kideek argudiatu dutenez, multinazionala pairatzen ari den krisia “koiunturala da, pandemiak eragindakoa”. “Tubacexen etorkizunari buruzko mezu baikorrak, pandemiaren aurrekoak, nabarmenak dira eta artxiboetan daude. Produktuen trantsitzio eta dibertsifikazioa modu egokian egiten ari zen. Horregatik, ez dugu ulertzen orain esatea hau urrutitik datorrela”.
