Laudioko eta Amurrioko Tubacexeko behargin guztiei eragingo die enpresako berregituraketa planak. Atzo izan zen Enpresa Batzordearen eta zuzendaritzaren arteko bilera, eta bertan azaldu zituzten arduradunek Enplegua Erregulatzeko Espedientean 150 pertsona sartzeko asmoa.
"Egoera larria"
"Egoera larria" da EAJren iritziz: "alderdi jeltzaleak langileei eta haien familiei ahalik eta babes eta elkartasun handiena berretsi nahi die". Ildo beretik, ordezkari sindikalak elkarrizketa sozialetik lan egitera animatu dituzte, "egoera zail honen aurrean ahalik eta akordiorik onena lortzeko, enplegua galtzea ekarriko ez duten irtenbideak lehenetsiz".
EAJren hitzetan, kolpe latza da eskualde osoko industria ehunarentzat eta kalitatezko enpleguarentzat Tubacexeko zuzendaritzak hartutako erabakia. "EAJk, erakundeetan dituen ordezkari politikoen bidez, lanean jarraituko du bere esku dauden neurri guztiak martxan jartzeko; enpresaren erabakia leundu edo, gutxienez, inpaktu txikiagoa eragin ahal izateko".
Aurreratu dutenez, mozioak eta adierazpen instituzionalak proposatuko dituzte eskualdeko udaletan. "Era berean, eskualdeko herritar guztiak animatzen ditugu gure udalerrian enpleguaren defentsan egingo diren ekimenak eta mobilizazioak babestera. Bilera horietan, orain arte bezala, EAJko ordezkariak izango dira".
Valvospainen galera
Tubacexen aferaz gain, Amurrioko Valvospain Industrial enpresaren egoera ere izan dute hizpide oharrean jeltzaleek. Iragan astean iragarri zuten langile guztiak kaleratzeko erabakia, eta horrek 79 behargini eragingo die.
Fabrikako egoera aintzat hartuta, jeltzaleek "modu proaktiboan lan egiten" jarraituko dute, "sare ekonomikoan eta bereziki lurralderako proiektu estrategikoetan industria jarduera eta kalitatezko enplegua defendatu eta bermatzeko".