Larunbatean jakinarazi zuen Eusko Jaurlaritzak uko egin diola, behin betiko, Armentia-2 gas putzua egiteko proiektuari. Horrek suposatzen du, printzipioz, gasa uztiatzeko egitasmoak ere baztertu dituela erakundeak. Fracking Ez Aiaraldea plataformak mezua bidali die eskualdeko herritarrei zein hedabideei horren inguruan.
Taldeak bi helburu izan ditu mezu horrekin. Alde batetik, aldarrikatzea herritarrek egindako ahaleginak Frackinga gelditzeko. Horrela, proba sismikoen kontrako mobilizazioak egin eta Herri Ekimen Legegilea aurrera ateratzeko Aiaraldean 5.000 sinadura baino gehiago jaso izana goraipatu du. Plataformaren hitzetan, askok Aldaketa Klimatikoaren Legeari egotzi diote Eusko Jaurlaritzako erabakia, "baina komenigarria da gogoratzea herri mobilizazioagatik izango ez balitz, Araba eta Bizkaia putzuz josita egongo liratekeela jadanik".
Eskualde eredugarria
Bestetik, Frackingaren kontrako kolektiboak aiaraldearrak eta ingurumena zaintzeko duten grina omendu nahi izan ditu: "Esker hitzak besterik ez ditugu Aiaraldeko herritarrekiko, eskualdea nola zaintzen den erakutsi baitute eta jarraituko dute egiten datozen erronketan; eukaliptoen gehiegizko landaketaren aurka edota ibaiaren osasunaren alde. Mila esker, beraz, bileretan, hitzaldietan eta mobilizazioetan parte hartu duzuenoi, sinatu duzuenoi edota banderola, sudadera eta kamiseta ikusgai izan duzuenoi".