Bi egunez luzatu da Tubacexeko zuzendaritzak Laudio eta Amurrioko lantegietan ezarritako Enplegua Erregulatzeko Espedientearen aurkako epaiketa. Bi epaiketa berezitu izan dira, eta Justizia Auzitegi Nagusiko bi areto desberdinen esku dago orain epaia.
Astelehenean TTI lantegietako kaleratzeak aztertu zituzten Garbiñe Biurrin presidente duen aretoan. Epaiketa hasi aurretik epaileek proposamena plazaratu zieten bi aldeei: Enplegua Erregulatzeko Espedientea mahaiaren gainetik kentzea, eta Lana Aldi Baterako Erregulatzeko Espedientea ezartzea, kaleratutako langileak berronartuz. Enpresa Batzordeak proposamena onartu zuen, baina zuzendaritza horren aurka agertu zen.
Asteartean, berriz, Aceralava altzairutegiko kaleratzeen txanda izan da. Juan Carlos Iturri epailearen aretoan gauzatu da bigarren saio hau.
Mobilizazioak Bilbon
Jauregiaren aurrean protesta ekimena egin dute Tubacexeko ehunka grebalarik bi egunetan. Gaur, gainera, martxa egin dute Laudioko piketetik epaitegi atariraino, eta herritar eta enpresa batzorde ugariren babesa jaso dute bidean.
Ebazpenaren zain
10 eguneko epean espero dute jasotzea epaileen ebazpena. Langileak baikor azaldu dira eta kaleratzeen baliogabetzea espero dute: "Frogatuta geratu da enpresak egoera koiuntural bat baliatu zuela neurri estrukturalak ezartzeko". Bien bitartean, borrokan jarraituko dute, "orain arte egin bezala, kaleratu guztiak berronartuak izan arte". 132 egun bete dituzte greba mugagabean dagoeneko.
