Bizkaiko hiriburua eta inguruko herriak komunikatzen dituen tren zerbitzuaren zenbait erabiltzailek ekimena abiatu dute sinadurak biltzeko. Egitasmoaren helburua da 500 babes eskuratzea Eusko Legebiltzarrean erantzun dezaten galdera bat: Zergatik ez du Eusko Jaurlaritzak exijitzen bere esku geratzea EAEko Renfeko kudeaketa?
Izan ere, erabiltzaileek salatu dute utzikeria nagusitu dela azken urteotan garraio enpresa publikoan Euskal Autonomia Erkidegoan: trenek 30 urte baino gehiago dituzte, langile gero eta gutxiago daude, ez dago piezak trenak konpontzeko oso zaharrak direlako...
Zentzu horretan, ekimenaren sustatzaileek gogoratu dute ezinbesteko zerbitzua dela lantokira joateko, besteak beste, eta 10 milioi bidaiari garraiatzen dituela urtero Renfek Bilbo eta inguruetan. Halaber, azaldu dute pandemiak gutxien kaltetu duen garraio publikoa izan dela, erabileraren aldetik.
Horregatik guztiagatik, azpimarratu dute ez dutela ulertzen zergatik Eusko Jaurlaritzak ez dizkion proposatzen negoziazioak Espainiar Gobernuari Renferen kudeaketa bere esku gera dadin.
Horren erantzuna jasotzeko eta garraio publiko mota horretan hobekuntzak aldarrikatzeko da, hain zuzen, sustatutako sinadura bilketa.
Aiaraldean Renfeko zerbitzuak hamaika arazo izan ditu pandemia hasi zenetik eta ezbeharrak biderkatu dira azken hilabeteetan. Suteak, matxurak eta pilaketak gertatu dira maiz.
