ANALISIA

Tubacexeko kaleratzeak baliogabetu ondoren, orain zer?

Aceralava eta TTI enpresetan bertan behera utzi dituzte epaileek, baina etorkizuna ez dago guztiz argi. / Aiaraldea.eus

Aceralava eta TTI enpresetan egindako kaleratzeak bertan behera geratu ostean, panorama berria ireki da Tubacexen, baina zalantza ugari dago oraindik enpresak hartuko dituen erabakien inguruan. Izan ere, berriro onartu behar dituzten beharginak etxean utzi ahalko lituzke enpresak, lan egin gabe.

Atzo publiko egin ziren TTI eta Aceralava enpresen epaiketen sententziak. Biek ebatzi zuten 129 kaleratzeak nuluak zirela eta ezer ezean utzi zituzten Tubacex taldeak erabilitako argudioak.

Albistea poztasunez jaso zuten atzo langileek, epaiek multinazionala derrigortzen baitute behargin kaleratuak berriro onartzera. Alegia, sententziak argitaratu bezain pronto, enpresak altan eman behar ditu euren borondatearen aurka kaleratutako langile guztiak eta soldatak ordaintzen hasi. Horretarako 5 eguneko epea dauka Tubacexek, eta egingo ez balu, sindikatuek salatuko lukete, sententzia egikaritu dezaten epaitegiek.

Lanera itzuliko dira?

Edonola ere, epaiketa irabazi izanak, antza, ez du ziurtatzen kaleratuak euren lanpostuetara itzuliko direnik. Zehazki, euren eskubidea itzultzea bada ere, ITP konpainiak irekitako bidea har dezake zuzendaritzak. Hau da, beharginei soldata ordaintzea, baina ez baimentzea lantegietara edo bulegoetara itzultzea, lan falta argudiatuta.

Jagoba Luengas lan esparruko abokatuak argitu duenez, 297.2 artikuluak horretarako tartea ematen dio enpresari.

Sindikatuen susmoa da enpresak erabakiko duela berriro onartu behar dituen langileak etxean uztea, lan karga urria duela argudiatuta

Dagoeneko Tubacexeko zenbait sindikatuk susmo hori daukate eta gaur bertan bilera egingo dute epaien ostean zer egin adosteko.

Helegitea

Bestalde, EAEko Auzitegi Nagusiaren sententzien kontrako helegitea jartzeko 5 egun ditu Tubacexek. Berez, enpresak maiatzean aurreratu zuen hori egiteko asmoa duela.

Epaitegietako bidea asko luzatzea ekarriko du horrek, Espainiako Auzitegi Gorenak bere iritzia eman beharko baitu kasuen inguruan. Jagoba Luengas abokatuaren iritziz, horrek urtebetez luzatuko luke prozesu osoa, gutxienez.

Norbanakoen salaketak

Salaketa kolektiboak ez ezik, langile kaleratuen norbanakoen salaketak ere daude. Alegia, bi sententziek aipatu dute zenbait afera (generoan oinarritutako bazterketa edo eskubide sindikalen urraketa) baloratu daitezkela epaitegietan, EAEko Auzitegi Nagusiak alboratu dituen arren.

Edonola ere, salaketa horiek geldirik daude momentuz, ezinbestekoa baita helegiteak bere ibilbidea amaitzea. LAB sindikatuko abokatuak hala adierazi du: "Lehenik eta behin, helegitea ebatzi behar da. Langile bakoitzaren salaketari buruz erabakitzeko. Epaileek helegitearen emaitza izan behar dute, sakontasun osoz hautatzeko zer egin".

Ez da hori helegitearen menpe geratuko den erabaki bakarra. Luengasek gogoratu du langile kaleratuek apiriletik uztailera bitarteko soldatak ere jaso beharko lituzketela, baina hori ez da posible izango epaiketak bide osoa amaitu arte.

Greba

Tubacexeko greba Aiaraldean 147 egun bete ditu gaur, eta epaiketak irabazi eta kaleratzeak nulu izan arren, sindikatuek ez dute momentuz lanuztea bertan behera utzi.

Esan bezala, gaur izango dute bilera hurrengo urratsak eztabaidatzeko, baina zuzendaritzaren jarrerak ere zerikusia izango du eta, momentuz, ez dirudi greba etengo denik. Gaur ere piketeak egon dira fabriken sarreretan.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide