ENPRESA BATZORDEAREN BALORAZIOA

Sententzian jasotakoa betetzea exijitu dio Tubacexeko Enpresa Batzordeak zuzendaritzari

Poztasuna nagusitu zen atzo Laudio eta Amurrioko piketeetan epaien berri jaso zenean. / Aiaraldea.eus

Tubacexeko Enpresa Batzordeak oso positiboki baloratu ditu kaleratzeen aurkako epaiak. Bilera eskatu dute zuzendaritzarekin, sententzien osteko agertoki berriaz hitz egiteko. Uztailaren 14an manifestazioa egingo dute Laudion, eskualdeko herritarren babesa eskertzeko.

Gaur bildu da Tubacexeko Enpresa Batzordea atzo jasotako epaiaren balorazioa egin eta greba mugagabearen hurrengo urratsak zehazteko. Langileen ordezkariek "oso positiboki" baloratu dute Justizia Auzitegiak kaleratzeak baliogabetu izana.

Enpresa Batzordearen iritziz, sententziak arrazoia ematen die negoziaketa prozesuan zehar langileek mahai gainean jarritako argudioei: "Sententziak argi uzten du ez zegoela Enplegua Erregulatzeko Espedientea ezartzeko inolako justifikaziorik".

Zuzendaritzari eskaera

Tubacexeko zuzendaritzari sententzian jasotakoa betetzea besterik ez zaiola geratzen adierazi du Enpresa Batzordeak, epaileek zehaztu bezala: Langile guztiak berriro hartzea, eta euren lanpostuetara bueltatzea, kaleratuak izan aurretik zituzten baldintza berdinekin.

Tubacexeko zuzendaritzari sententzian jasotakoa betetzea besterik ez zaiola geratzen uste du Enpresa Batzordeak

Zentzu honetan bilera eskaera luzatu diote Tubacexi, sententziak irekitako agertoki berriaz eta honen exekuzioaz hitz egiteko.

Instituzio publikoetara ere zuzendu dira langileak, enplegua bermatzeko promesak betetzea eta lan erreformak indargabetzea eskatuz: "langile gehiago ez daitezen egoera berdinean aurkitu".

Manifestazioa

Eskualdeak Tubacexeko beharginen borrokan erakutsitako elkartasun guztia eskertzeko manifestazioa deitu du Enpresa Batzordeak datorren uztailaren 14rako -asteazkena-. Mobilizazioa Laudioko Tubacexeko lantegi aurretik abiatuko da, 18:30ean.

Atal sindikalen balorazioa

Gaur goizean sententziaren balorazioa egin dute Tubacexeko hainbat atal sindikalek. ELAk prentsaurrekoa eskaini du sententziaren nondik norakoak aletzeko. Sindikatuaren iritziz, epaiak agerian utzi du enpresaren iruzurra.Izan ere, eta horrela jasotzen dute epaiek, Tubacexek galerak puztu zituen kaleratzeak justifikatu ahal izateko. "Hau oso larria da, eta oso zorrotz aztertuko dugu, erabakitzeko ea enpresak beste nolabaiteko erantzukizunik ez ote duen", adierazi dute sindikatuko kideek.

ELAk balioan jarri ditu sindikatutik gauzatutako perito lanak, "gezurtatu egiten baititu enpresaren argudio guztiak". Bost eguneko epea du orain enpresak langileak berronartzeko. Hori egin ezean, ELAk ohartarazi du greba mugagabearekin aurrera jarraitzea baloratuko duela.

Espainiako Auzitegi Gorenean aurkeztutako helegitea erretiratzea eskatu du LABen atal sindikalak, honek gatazkaren luzatzea ekarriko lukeela ulertuta

LAB sindikatuak epaia onartzea eta langileak berriro hartzea eskatu dio Tubacexi, eta gaur egungo zuzendaritzaren eta Jesus Esmoris kontseilari delegatuaren dimisioa eskatu du, “solaskide baliodunak” izateari utzi diotela argudiatuta. Borrokan jarraituko dutela adierazi dute sindikatutik: "gatazkaren beste etapa bat besterik ez da hau".

Beste eskaera zehatz bat ere luzatu diote LABeko atal sindikaletik zuzendaritzari: Espainiako Auzitegi Gorenean aurkeztutako helegitea erretiratzea, honek gatazkaren luzatzea ekarriko lukeela ulertuta. "Baldintza hori ezinbestekoa da mehatxurik gabe hitz egin ahal izateko eta fase honi eta gatazkari ahalik eta ondoen amaiera emateko", azaldu dute sindikatuko ordezkariek.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide