Tubacexetik kaleratuak izan ziren langileek grebaren mesedetan jarriko dute zor zaien soldata, ELAk eta LABek grebaren alde egin ostean

Justizia Auzitegiak 129 kaleratzeak baliogabetu ostean, langileak berrartzera derrigortuta dago multinazionala. / Aiaraldea.eus

Tubacexeko greba mugagabeak 156. eguna bete du gaur, eta atal sindikalak asanbladak egiten ari dira grebaren etorkizunaz eztabaidatzeko. ELAk eta LABek honezkero hartu dute greba mugagabearekin aurrera jarraitzeko erabakia. Bien bitartean, berrartuak izan diren beharginek adostu dute jaso behar dituzten soldatak grebaren mesedetan jarriko dituztela.

EAEko Justizia Auzitegia Tubacexeko kaleratzeak baliogabetu ostean, kaleratuak izan ziren 129 langileak berrartzeaz gain, hauei zor zien soldata ordaintzera derrigortuta dago zuzendaritza.

Enpresak, bere aldetik, langileak lanera bueltatzen ez uzteko erabakia iragarri zuen sententzia ezagutu eta bost egunera, PCB-ITP Aeroko eredua jarraituz. Berrartutako langileak etxean geratuko dira soldataren %100 jasotzen, baina lanik egin gabe, eta bitartean hauen irteera bultzatuko du zuzendaritzak, kasu bakoitza banan banan aztertuz. Gauzak horrela, uztailaren 7tik aurrera dagokien lansaria jaso beharko dute berrartuak izan diren langileek, plus guztiak barne.

Egoera horren asurrean diru hori kutxa komun batean biltzea erabaki dute, greba mugagabearen mesedetan, beharra duten langile guztien artean banatzeko.

Greba mugagabearen mesedetan, soldaten dirua kutxa komun batean biltzea erabaki dute, beharra duten langile guztien artean banatzeko

Erabaki honek bultzada berria ematen dio 156. eguna bete duen lanuzteari. Aste honetan iragarri bezala, Enpresa Batzordeak atal sindikalen esku utzi du grebaren etorkizunaren gaineko eztabaida, behin betiko erabaki  bat hartu aurretik. Gauzak ondo bidean, astelehenean batzartuko dira ordezkari sindikal guztiak hurrengo urratsak definitzeko. Bien bitartean, ELAk eta LABek publiko egin dute grebarekin aurrera egiteko hartutako erabakia.

120 bozka greba mugagabearen alde

ELAk gaur goizean ospatu du afiliatuen asanblada. Greba mugagabearekin zer egin erabaki dute bertan bozketa bidez. Afiliatuen bi herenek babestu dute grebarekin aurrera jarraitzeko planteamendua, horren aldeko 120 botorekin. Beste 48 afiliatuk greba uztearen alde egin dute, eta 6k boto zuria eman dute.

Grebaren aldeko apustua eginda, erabakia asteleheneko Enpresa Batzordean aurkeztuko du ELAk. Zuzendaritzari eta Eusko Jaurlaritzari mezua helarazi diete ere sindikatuaren asanbladatik, sententzian jasotakoa bete dadin exijituz.

"Atzera pausorik ez"

Atzera pausorik ez emateko deia egin du, bere aldetik, Tubacexeko LABen sail sindikalak. Greba mugagabearekin aurrera jarraitzeko erabakia hartu du ere sindikatu abertzaleak: "Horrela nahi duten langile guztiak beren lanpostuetan berriro onar ditzatela eskatzen dugu".

Pisuzko bi arrazoi eman ditu LABek  mobilizazio mugagabearekin aurrera jarraitzeko: Langileak etxean uzteko enpresak hartutako erabakia eta Auzitegi Gorenean aurkeztutako helegitea kendu ez izana. Sindikatuaren iritziz, bost hilabeteren ostean greba bertan behera uzteak kaleratuak izan ziren langileen eta euren familien etorkizuna Madrileko auzitegiaren esku jartzea litzateke. LABek uste du langileek, gizarteak eta legeak bermatutako indar-posiziotik, "indar handiagoz eskatu behar dela lankide horiek beren lanpostuetara itzultzea gainerakoen baldintza berberetan". Gaur egungo zuzendaritzaren dimisioa ere eskatu du sindikatuak.

Horrez gain, Garbiñe Aranburu Idazkari Nagusiaren bisita jaso dute gaur LABeko afiliatuek eta Tubacexeko langileek Amurrioko piketean bertan. Aranbururekin batera , Xabier Ugartemendia eta Iratxe Azkue sindikatuko kideak ere egon dira. Tubacexeko langileekiko konpromisoa berretsi nahi izan du sindikatuak modu horretan.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide