AZKEN ORDUKOA

Tubacexeko langileek greban jarraituko dute, zuzendaritzaren proposamena eskasa dela iritzita

Aimar Gutierrez Bidarte 2021ko uzt. 26a, 21:46
Deskargatu Info Ahotsak :

Enpresa Batzordeko ordezkariak bilerara sartzeko zain. / Aiaraldea.eus

10 orduz luzatu da Enpresa Batzordearen eta Tubacexeko zuzendaritzaren arteko bilera. Multinazionalak uko egin dio helegitea erretiratzeari. Bi aldeek ez dute adostasunik lortu, eta Enpresa Batzordearen gehiengoak greban jarraitzea adostu du. 

Laudioko lantegian elkartu dira Tubacexeko Enpresa Batzordeko ordezkariak eta multinazionaleko zuzendaritza lan gatazkari irtenbide bat bilatzeko helburuarekin.

8:00etan iritsi dira zuzendaritzako kideak lantegira. Bi autobusetan eta ertzaintzaren dispositibo zabal batez inguratuta egin dute sarrera, autobusetan, duela hilabeteak ikusten ez zen irudia errepikatuz. Ordezkari sindikalak 10:30ean sartu dira bilerara, piketean bildutako dozenaka lagunen txaloen artean. 

10 orduko bilera

Bilera 10 orduz luzatu da eta bi aldeen proposamenek mahaigainean egin dute talka. Madrilgo Auzitegi Gorenean enpresak jarritako helegitea erretiratzea eskatu dute langileen ordezkariek, eta baja boluntarioen eta aurre-jubilazioen plan berri bat martxan jartzea proposatu diote multinazionalari. Horrez gain, lan hitzarmenean adostutako zenbait kontu aldatzea proposatu dute ere: langileek uko egingo liokete bertan hitzartutako kontratazio berrien konpromisoari eta enpresak, ordainetan, azpi-kontratazioei egin beharko lieke uko.

Enpresak, bere aldetik, kontrako norabidean jo du. Ez dio uko egin helegitea erretiratzeari ez eta Enplegua Erregulatzeko Espedientearekin aurrera jarraitzeko asmoari, justiziak horrela ahalbidetuko balu. Aurreko asteko proposamenean adierazi bezala, eutsi egin dio EEEak kaltetutako langileak berronartzeko asmoari, baina Auzitegi Goreneko epaia atera arte soilik. 

"Multinazionalaren asmoa greba mugagabea berehalakoan bertan behera uztea da", adierazi dute Enpresa Batzordeko kideek, "gu ere greba bertan behera uzteko prest gaude, behin gure helburuak lortuta".

Greba mugagabea aurrera

166. eguna bete dute gaur Tubacexeko beharginek greba mugagabean eta gehiago beteko dituzte. Izan ere, Enpresa Batzordeko gehiengoak lanuztearekin aurrera jarraitzea ebatzi du, multinazionalak aurkeztutakoa nahikoa ez dela iritzita.

Ekonomia

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide