Tubacex enpresako akordioaren sinaketak airean jarraitzen du oraindik. Nahiz eta ostiralean indar sindikalen afiliazioek -ELAkoak eta CCOOkoak- ontzat eman zuten dokumentua, ez dago argi zuzenean onartuko dituzten Eusko Jaurlaritzaren, multinazionaleko zuzendaritzaren eta Langile Batzordearen artean negoziatutako baldintzak.
Izan ere, CCOOk bere afiliatuei iragarri zien soilik jarriko zuela sinadura itunean gehiengo zabalak babestuko balu, eta ez da horrela izan, STATek eta LABek aurka egin eta Independenteek behargin guztien bozketa eskatu baitzuten.
Hala ere, Enpresa Batzodeko presidenteak astelehenean bilera egitea eskatu die Eusko Jaurlaritzako ordezkariei. Edu Ibernia ELAko kideak ulertzen du gehiengoak bozkatu duela akordioaren alde eta, ondorioz, aurrera egin beharko luketela, hasierako planari jarraiki.
Edonola ere, Eusko Jaurlaritzak erantzun dio nahiago dutela CCOOren behin betiko erantzuna ezagutu arte itxarotea.
Bihar 09:00etan batzarra
Gauzak horrela, bihar batuko dira 09:00etan berriro Tubacex enpresan ordezkaritza duten eragile sindikalak, CCOOk eskatuta. Sindikatu horrek aipatu zuen ostiralean langile ororen bozketa proposatuko duela egoera desblokeatzeko, eta litekeena da STATek eta Independenteek proposamena babestea. Alegia, ostegunean bi antolakunde horien iritzia zen hobe zela horrela egitea, sindikatuen afiliatuen iritziarekin soilik egitea baino.
Printzipioz, ELAren asmoa da eustea osteguneko planari. "Adostu genuen afiliazioek bozkatzea akordioaren onarpena eta horrela egin dugu. Ez diot zentzurik ikusten bozketa errepikatzeari. CCOOk aukera hori babestu zuen eta ez dut ulertzen iritzi aldaketa" adierazi du Edu Ibernia Langile Batzordeko presidenteak.