Indarkeria matxistaren aurkako mobilizazio eguna izango da biharkoa (azaroak 25, osteguna) Aiaraldean. Eskualdeko ia udalerri guztietan egingo dira elkarretaratzeak eta bestelako aldarrikapen ekintzak.
Amurrio
Amurrion egitarau bateratua aurkeztu dute Otsemeak talde feministak eta Ikama ikasle antolakundeak. Lehenegoak tailerrak eskainiko ditu Zaraobe Institutuan goizean. Bigarrenak, aldiz, elkarretaratzea egingo du 12:00etan, udaletxe aurrean.
Arratsaldean, aldiz, mobilizazio zaratsua egingo dute, toki beretik abiatuta, 19:30ean.
Udalak ere jarduera ugari egingo ditu arratsaldean. Txapa banaketa burutuko du 18:00etan Juan Urrutia plazan. Zankueta abesbatzaren emanaldia egongo da 19:00etan toki berean, eta elkarretatzea egingo da jarraian.
Amurrio Antzokian, aldiz, A golpe de palabra antzerki laburra eskainiko dute 18:00etan eta 10:00etan. Sarrerak doan izango dira, eta helbide honetara idatzi behar da erreserbatzeko: info@afolpedepalabra.com.
Laudio
Laudioko Udaleko talde politikoek adierazpen instituzionala irakurriko dute 13:30ean udaletxe aurrean. 18:30ean, aldiz, elkarretaratzea egingo da toki berean, Solastiar, Avillo, Jakaranda eta Etawasol elkarteen eskutik.
Artziniega
“Topaketa” deitu dute 19:00etan frontoian. Herriko talde feministak, Hiriska emakume taldeak eta udalak antolatu dute ekimena. Abesbatza feministak kantatuko du, irakurketa plazaratuko da, eta “zaratakada” egingo dute jarraian.
Okondo
Okondon ez dute ohiko formatuko mobilizaziorik egingo. Horren ordez, “Emakume libreen murala” inauguratuko dute, 18:00etan, Kultur Etxearen kanpoaldean.
Orozko
Orozkon 19:00etan egingo dute elkarretaratzea, Zubiaur plazan.
Urduña
Urduñan 19:00etan egingo dute elkarretaratzea, Foru plazan. “Aurten, udalerriko hainbat sortzailek hartuko dute parte. Nabarmentzekoa da, gainera, manifestua euskaraz, gaztelaniaz eta arabieraz irakurriko dela”, azaldu du udalak.
Ondoren, Tepsis Teatro konpainiak Despierta! Retablos de la vergüenza lana taularatuko du, toki berean. Obra hori izan zen hirian eginiko Neskartfest jaialdiko lan irabazlea.
Aiara
Aiarako elkarretaratzea 18:00etan izango da, Arespalditzako ferialean.
Jarduera ugari datozen egun eta asteetarako
Indarkeria matxistaren aurkako aldarria ez da biharko egunera mugatuko. Datozen asteetarako ere hainbat jarduera antolatu dituzte eskualdeko tokiko erakunde eta elkarteek. Aiaraldea.eus atariko Agenda atalean ikusi daitezke egitarau guztiak.