Gaur eguerdian plazaratu du Osakidetzak COVID-19 birusari buruzko txosten epidemiologikoa eta emaitzak ez dira bereziki baikorrak. Izan ere, osasun sistema publikoak 38 positibo berri erregistratu ditu Aiaraldean:
Herri kaltetuena zenbaketa horretan Laudio izan da, 17 kasu berri izan baititu ostegunetik igandera, baina Amurriok 13 izan ditu, Urduñak 4, Okondok 3 eta Arakaldok bakarra.
Gauzak horrela, sei dira jadanik eremu gorrian dauden udalerriak. Aiara ez ezik, azken datuekin Amurrio, Laudio, Okondo, Arakaldo eta Urduña ere daude egoera horretan. Hau da, 100.000 biztanleko 150eko intzidentzia metatuaren tasa gainditu dute.
Horrek neurri murriztaile gehiago ekar ditzake, baina aintzat hartu behar dira bi elementu. Alde batetik, eremu gorrian sartzeko langa nabarmen jaitsi duela Eusko Jaurlaritzak azaroan (lehen olatuan 500 zen eta bigarrenean 400). Bestetik, herri txikietan tasaren larritasuna desitxuratzen da. Esaterako, Arakaldon kutsatu bakarra egon da eta intzidentzia metatuaren tasa 0tik 588,24ra igaro da. Aiaran edo Okondo antzeko fenomenoa gertatzen da.
Hala ere, ezin da ukatu birusaren zabalpenak gora egin duela azken asteotan eta tasek hori islatzen dutela.