Aiaraldea Ekintzen Faktorian egingo du hurrengo geldialdia 'Nomadak gaittun' azokak. Dinagu kolektiboak iragarri du jada bere hurrengo ekimena sare sozialetan: martxoaren 12an Faktorian elkartuko dira Euskal Herriko emakume sortzaileak. "Badugu geltoki berria eta Euskal Herriko beste probintzia bat zapaltzera goaz, Araba! Emakume Langilearen Egunaren bueltan egingo dugu azoka, martxoaren 12an, eta egun osokoa izango da, 11:00etan hasi eta 18:30ak arte", zehaztu dute. Xehetasunak aurrerago zabalduko badituzte ere, abiapuntua markatu dute: "Ei! Ez gara bakarrik egongo ez pentsa! Baina detaile guzti horiek jakiteko oraindik pixkat falta da!".
Izena emateko, astebete
"Emakume sortzailea bazara eta nomada izan nahi baduzu, bete gure perfilean aurkituko duzun linkean dagoen galdetegia. Aurreinskripzio orria da, eta bertan datu batzuk eskatuko dizkizuegu. Sortzaile asko egonez gero, ondoren aukeraketa burutuko dugu nomadon azken zerrenda betetzeko", erantsi dute. Hain zuzen, otsailaren 13 arte egongo da apuntatzeko aukera:
Parte hartzeko baldintzak
Sortzaileen kuota 30 eurokoa izango da. "Diru hori bere osotasunean azoka antolatzera eta Dinaguk elkarte bezala dituen gainontzeko gastuei aurre egitera bideratuko da. Sortzaile bakoitzak noski, kuota ordaindu izanaren faktura jasoko du", erantsi dute. Partaideen hautaketa otsailaren 15ean jakinaraziko dute, baldin eta espazioak ahalbidetzen duena baino eskaera gehiago egongo balira.
2021eko azaroaren 20an antolatu zuen Faktoriako feminismo ildoak Aiaraldeko emakume* sortzaileen azoka, eta bertan izan ziren Dinaguko kideak euren proiektua aurkezten:
