Prentsaurrekoa egin dute EH Bilduko Aiaraldeko hautetsiek gaur goizean Amurrioko San Anton plazan. Aiaraldeko Ponentzia Sozioekonomikoa izan dute hizpide. Iaz onartu zen dokumentu hori Eusko Legebiltzarrean, eta diru kopurua ere zehaztu zen: 26 milioi euro bideratuko dira eskualdea ekonomikoki suspertzera, Berehalako Jarduera Plan baten bidez.
Baina EH Bilduko kideek ez dute oraindik plan horren berririk. Hori da, funtsean, gaurko agerraldian plazaratu dutena, eta “kezka” adierazi dute, ikusten dutelako behin betiko proiektuak arriskua daukala “leiala” ez izateko eskualdeak behar duen suspertze ekonomikoari dagokionez.
Prentsaurrekoa egin dute Aiaraldeko EH Bilduko hautetsiek, ponentzia sozioekonomikotik eratorritako 26 milioi euroei buruzko informazioa eskatzeko.
— Aiaraldea.eus (@aiaraldea) February 22, 2022
Itziar Biguri Urduñako alkateak azaldu dizkigu agerraldiaren arrazoiak pic.twitter.com/syDuYPUlMz
Itziar Biguri Urduñako alkateak eman ditu gaiari buruzko xehetasunak, Joseba Vivanco Artziniegako gobernuburuarekin batera:
Koalizioko kideek azaldu dutenez, urtarrilean eskatu zuten plana Arabako Batzar Nagusietan, eta erantzunak “alarma guztiak” piztu zizkien. “Izan ere, kontratatutako enpresak dokumentua bukatu ostean Arabako Foru Aldundiari eman zion eta ondoren Eusko Jaurlaritzak, Arabako eta Bizkaiko Foru Aldundien artean sortutako lan-mahaian balioztatu behar zela erantzun ziguten”.
Horregatik, EH Bilduko kideek salatu dute ez direla ezarritako epeak betetzen ari, eta informazioa eskatu diote lan-mahaiari. “Gardentasuna, parte-hartzea eta erantzukizun politikoa eskatzen dugu, gure eskualdearen etorkizuna jokoan baitago”.
Hiru urteko ibilbidea
Koalizioko kideek gogorarazi dute eurak izan zirela Eusko Legebiltzarrean ponentzia sozioekonomikoa sortzea proposatu zutenak, “egoera aztertzeko eta talka-plan bat eratzeko”.
Lehen saiakera hura hauteskundeengatik eten zen, EH Bilduko kideek azaldu dutenez. “Legealdi honetan berriz ekin zaio ponentziari, eta 2021ko azaroan finkatu ziren bai berehalako jarduera bai eta Aiaraldeko plan estrategikoa oinarritzeko irizpideak”.
Talde independentistak dokumentua babestu zuen, berak egindako “ekarpen kualitatibo zein kuantitatibo asko” jasotzen zituela ulertuta. “Horien artean zegoen inbertsioetarako aurrekontua 26 milioi euro arte handitzea”.
Era berean, gaineratu dute EH Bildu bere dokumentu propioa eratu duela: Ernaberri Plana. “Plan estrategiko bat da, eta eskualdearen suspertze ekonomikoa du helburu, beheralako 10 jardueren bidez”.
