Atzo Aiaraldeko EH Bilduko hainbat ordezkarik agerraldia egin zuten Laudioko Kasinoan. Eskualdeko herri guztietako zenbait zinegotzik eta alkateek hitza hartu zuten Aiaraldeko Suspertze Sozioekonomikoaren Planari buruz aritzeko.
Hain zuzen, koalizioko kideek exijitu zioten Arabako Foru Aldundiari zehazteko zer egingo den lortutako 28 milioi euroekin. Itziar Bigurik -Urduñako alkateak- aipatu zuen: "plana atzerapenarekin dator, parte-hartze faltarekin eta gardentasun faltarekin".
Horren isla da Iñaki Ibarluzeak -Amurrioko zinegotziak- aipatutakoa: "Legebiltzarreko ponentziaren ondorioetan jasota zeuden proiektu batzuen desagerpenak kezkatzen gaitu, adibidez, hiltegi berri baten bideragarritasun-azterlanaren kasua".
EH Bilduk salatu du Aiaraldeko ponentzia sozioekonomikoan zehaztutako zenbait proiektu desagertu direla: https://t.co/n3xy2V3LOc
— Aiaraldea.eus (@aiaraldea) March 25, 2022
Iñaki Ibarluzea zinegotziak eman dizkigu gaiaren gaineko xehetasunak pic.twitter.com/76i7d07oX1
Laudio Antzokia finantzatzea ez zegoen aurreikusia Legebiltzarrean egindako eztabaidetan, baina eraikinak dirua jasoko du bere finantzaziorako. Bestalde, ostalaritza eskola irekitzeko proposamena desagertu da.
Laudio Antzokia, ostalaritza eskola edota hizkuntza eskola
EH Bilduk bat-bateko aldaketa horien adibideak azaldu dizkio Aiaraldea Komunikabideari. Esaterako, Legelbiltzarrean osatutako ponentzian Laudio Antzokia ez zen behin ere agertu, baina Foru Aldundiak eta Eusko Jaurlaritzak hainbat diru bideratu dute eraikinera.
Halaber, koalizioak adierazi du diagnosi guztietan agertzen zela eskualdean ostalaritza eskola irekitzeko beharra, baina ideia hori desagertu dela. Halaber, hizkuntza eskola ezartzea aurreikusten zen, baina ez da horren berririk izan.
Gardentasun falta
EH Bilduren aburuz , prozedura ez da betetzen ari eta alkate jeltzaleek zenbait proiektu lotu edo baztertu dituzte, hasieran proposatutako lehentasunen inkestak jarraitu gabe. Koalizioak modu horretan ulertzen du egin dela Laudio Antzokiaren finantzazioa edo Laudion Vital Fundazioak iragarri duen hizkuntza eskola.
EH Bilduren konpromisoa
Testuinguru horretan, koalizioak aldarrikatu du herriz herri egingo diola jarraipena Planari, gehienbat, zer egingo den argitzeko eta ponentzian eztabaidatutakoa betetzeko. Horrez gain, exijitu du eskualdeko ikuspegia izango duen egitura sortzea: “Funtsezkoa da estrategia komun bat diseinatu eta garatzea, eremu guztietan eta eskualde osorako. Estrategia komun baten faltak sortzen dituen zailtasunen adibide garbia sektore turistikoa da. Aiaralderako marka turistiko bat sortzea Aiarako Koadrilaren esku geratzen da, eta Bizkaiko udalerriak kanpo geratzen da”.