Hastear da 22. Korrika; eta aurtengoan ere ekimenaren jarraipen berezia egingo du Aiaraldea Komunikabideak bailaran barrena. Gainera, Amurrion izango da hasiera jaia eta, ondorioz, eguneko jarraipena are bereziagoa izango da.
Zuzeneko telebista saioa
10:00etatik 14:00etara zuzeneko telebista saioa ekoitziko du hedabideak zuzenean AEKren Amurrioko euskaltegitik. Honako eduki hauek izango ditu saioa:
- 10:00-11:00 // 'Korrika Hitzekin' mahainguruaren emisioa (Urtsa Errasti, Maite Ibarluzea, Asier Amondo eta Angela Ricorekin Faktorian eginiko solasaldia).
- 11:00-13:00 // Korrikako eta hasiera jaiko protagonistei elkarrizketak.
- 13:00-14:00 // 'Korrika kantuz kantu' musika saioa, Nerea Iglesias eta Gorka Chamorrorekin.
Zuzeneko kontaketa
Zuzeneko telebista saioarekin batera hasiko du komunikabideak zuzeneko kontaketa, Aiaraldea.eus atarian eta sare sozialetan. Egun osoaren unean uneko jarraipena egingo du horrela, argazki, bideo edota txioak bilduta.
Argazkiak eta bideoak
Herri guztietako argazki eta bideo-erreportajeak sareratuko ditu komunikabideak, arratsaldeko lehen ordutik gauera arte.
Irudiak bidaltzeko erredakzioa@aiaraldea.com helbidera edo 688 848 152 telefonora (Whatsapp edo Telegram) igorri daitezke mezuak.
Argazki lehiaketa eta porra bian
Horrez gain, argazki lehiaketa abiatuko du komunikabideak #KorrikaAiaraldean iruditan ere bistaratzeko. Saria 4 lagunentzat afaria izango da, Atxubi tabernaren babesletzari esker. Irabazlea boto bidez erabakiko dute webguneko erabiltzaileek. Parte hartzeko apirilaren 11 arte egongo da aukera:
Bestalde, porra antolatuko du Aiaraldea komunikabideak, lekukoaren mezua nork idatzi ote duen iragartze aldera. Asmatzaileen artean komunikabideko termo eta motxila bana zozkatuko da.
Atal berezia webgunean
Iritzi zutabeekin eta papereko aldizkari bereziarekin berotu zituen motorrak Aiaraldea Komunikabide Faktoriak 22. Korrikarako. Azken asteetan, eduki andana plazaratu dira atarian, euskara sustatzeko ekimenaren nondik norakoak zein bestelako ikuspegiak plazaratzeko. Horrez gain, Korrikako edizio zaharren bideo andana ere argitaratu du, Iñaki Ibarluzea Ortueta AEK-ko irakaslearen eskutik.
Eduki horiek guztiak ikusgai daude 'Korrika Aiaraldean' atari berezian.