Eusko Jaurlaritzako Segurtasun Sailak murrizketak eta debekuak aktibatuko ditu gauerditik aurrera Euskadiko Kantauri isurialdeko barnealdean eta kostaldean. Horrek esan nahi du 00:00etatik aurrera hurrengo jarduerak debekatuko dituztela:
- Sua erabiltzea edo sua eragin dezaketen jarduerak egitea, hala nola nekazaritza- eta baso-eremuetan deflagrazioak, txinpartak edo deskarga elektrikoak sor ditzaketen makinak erabiltzea.
- Su artifizialak, petardoak eta pirotekniako bestelako elementuak erabiltzea eta barbakoak egitea, hori guztia baita hiri-lurzoruan ere eta zuhaitzak eta zuhaixkak dauden lursailetatik, sastrakadietatik edo edozein eratako labore-sailetatik 300 metrora baino gutxiagora.
- Bertan behera geratuko dira uztondoak, larre iraunkorrak, inausketako adarrak eta basoko hondarrak erretzeko emandako baimen guztiak.
- Erretzen ari diren objektuak edo sutea eragin dezakeen edozein eratako materialak botatzea edo abandonatzea.
Isunak
Poliziaren esku egongo da zigorrak abiatzea murrizketa horiek betetzen ez dituzten herritarren aurka. Hain zuzen, arau-hauste larriak eta oso larriak egongo dira eta ezarri ahal izango diren prozeduren artean, 1.501 eurotik 30.001 eurora arteko isunak daude.
Indarrean alerta laranjak iraun bitartean
Segurtasun Sailak azaldu du neurriak indarrean egongo direla Euskalmetek alerta laranja mantentzen duen bitartean. Halaber, euren aurreikuspenen arabera, igandean amaituko da egoera. Edonola ere, eguraldiaren menpe egongo da Basoko Suteetarako Larrialdietako Plan Berezia bertan behera geratzea.
Arreta berezia Aiaraldean
Eusko Jaurlaritzak baso suteak prebenitzeko neurriak hartzeko beharra sumatu du haize boladen, tenperatura altuen eta lehortearen ondorioz, eta zenbait gune aipatu ditu, zeinetan arriskua handiagoa izan daitekeen. Horien artean dago Aiaraldea: "batez ere kostaldeko eta Kantauri isurialdeko barnealdeko zonaldean (Gipuzkoa, Bizkaiko eta Aiarako kuadrilla/Araba) eta Kantauri isurialdeko barnealdeko guneetan (Gipuzkoa, Bizkaiko eta Aiarako kuadrilla/Araba)":
Izan ere, gogoratu beharra dago asteburuan sutea piztu zela Artziniegan eta haizeak hainbat kalte utzi zituela.