Euskaraldiko agenda, herriz herri

Etzi abiatuko da Euskaraldia, ‘Hitzez ekiteko garaia da’ lelopean. Aiaraldeko hainbat herritan jarduerak antolatu dituzte ekimena sustatzeko eta txapak banatzeko.

Hilabete hasieran hasi zen nabaritzen Euskaraldia zetorrela. Aiaraldeko herri askotan jarduerak antolatu dituzte ariketaren berri eman eta berotzen hasteko. Ekimenak iraun bitartean ere, ekintza andana izango dira eskualdean, eta Aiaraldeko Euskalgintzaren Kontseiluak jaso du horien berri. Informazioa eguneratzen joango dira. Beraz, datu gehiagorako, aiaraldekoeuskalgintza.eus helbidera jo daiteke.

Batzuk aipatzearren, ostiralean bertan, Euskaraldiaren hasiera egunean, Arrankudiaga-Zollon egingo duten ekimena dago. Txokolatea eta txapak banatuko dituzte eta Euskaraldiko arropa jarriko dute salgai. 19:00etan, gainera, Txalainaken kontzertua egongo da herrian. Laudion ere jarduerak egongo dira ostiralean. Umeentzako jolasak, txapa tailerra eta txistorra jana izango dira arratsaldean, eta iluntzean, 20:00etan, Beti Jai Fanfarreak girotuko ditu kaleak. Aretan ginkana, txokolatada, talde argazkia, dantza plaza eta kalejira izango dituzte egun berean. Orozkon pilota partidak antolatu dituzte 18:00etan eta poteo musikatua 20:00etan. Urduñan, aldiz, zurezko plaza jokoak, txokolate jana, helduentzako bakarrizketa eta erromeria egingo dute, Garilak26 taldearen eskutik.

Hurrengo egunetan ere aukera egongo da han eta hemen Euskaraldiaren inguruko ekimenez gozatzeko. Urduñan egongo da lehen aukera, larunbatean bertan Euskararen aldeko mendi martxa antolatu baitu Txarlazo Mendi Taldeak. Okondon igandean “barrez lehertzeko aukera” egongo da Pantxikarekin. Arrankudiaga-Zollon, bestalde, mendi martxa egingo dute azaroaren 27an eta abenduaren 2an poteo musikatua eta bertso-afaria. Artziniegan photocall-a antolatuko dute azaroaren 27an, 12:30etik aurrera, frontoian. Laudion abenduaren 2an arratsalde osoko egitaraua prestatuko dute, txokolate eta talo janarekin, jokoekin, bertso saioarekin eta poteo musikatuarekin.

Euskararen Eguna

Nolanahi ere, egun handia abenduaren 3an ospatuko dute aiaraldearrek, denek batera, Euskararen Egun Bateratuan. Arakaldon izango da eta egun osoko egitaraua prestatu dute, gustu eta adin guztietarako. Goizeko 09:00etatik hasita eta iluntzera arte, mendi martxa, umeentzako jolasak, erraldoiak, bola jokoa, pilota partidak, bazkaria, bakarrizketa, erromeria eta DJ-ak egongo dira, besteak beste, euskararen aldeko aldarria eskualde osoan barreiatzeko.

Txapak jasotzeko azken aukerak

Oraindik txapa jaso ez duenak, hainbat aukera ditu eskuratzeko: Aiaran gaur eta bihar Udaletxean jaso daiteke 09:00etatik 14:00etara; Amurrion Amaurre Ikastetxean, Aresketa Ikastolan, AEKn, Zaraobe Institutuan, Mendiko Eskolan eta Zabaleko eskolan jaso daiteke, gaur eta bihar artean, 17:00etatik 19:00etara; eta Arrankudiaga-Zollon ostiralean bertan aukera egongo da 16:30ean. Orozkon ere egongo da txapak jasotzeko aukera, egun berean.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide