Gaur aurkeztu ditu Laudioko hodigileak 2022. urteko emaitzak Balore Merkatuaren Espainiako Batzordean. 20,2 milioi euroko mozkin garbiak izan ditu (92,3 milioi euro interesak, zergak, balio-galera eta amortizazioak kontuan hartu gabe). Multinazionalak plazaratutako datuen arabera, 714,7 milioi euroko salmentak izan zituen iaz, ia aurreko urtekoen bikoitza (%95,8 gehiago).
Horrez gain, 1.650 milioi euroko eskabide-zorroa duela azpimarratu du, “enpresaren historiako handiena”. Enpresaren iritziz, horrek “epe luzeko joera estrukturala berresten du”. Emaitza horiekin zor finantzarioa 49,1 milioi eurotan murriztu du Arabako enpresak 2021arekin alderatuta.
Enpresaren Plan Estrategikoari jarraiki, Tubacexek negozio-sektore berrietan sendotu nahi du bere presentzia, hala nola automobilgintzan, aeronautikan, aeroespazialean, biomasan eta hidrogenoan. Taldeak bereziki nabarmendu du 2022ko azken hiruhilekoan aeronautika sektoreko eskaera asko jaso zituela. Sektore hidraulikoan dituen espektatibak ere berretsi dituela adierazi du, “funtsezko bezeroekin epe luzerako akordioak lortzeari esker”. Halaber, sektore aeroespazialean AEBetako eskaera garrantzitsu bat lortu berri duela azpimarratu du.
Arreta mundu osoan jarrita duen multinazionala
Tubacexek azaldu duenaren arabera, 2022an “nazioarteko hazkunde estrategiarekin" jarraitu du. Salmenten %36 Asiako merkatura bideratu zituen, %31 Europara, %29 Amerikara eta gainerako %4a Afrikara. Azpimarratzekoa da Ekialde Ertainean gasa erauzteko 10 urtetako kontratua esleitu diotela, 30.000 tonatik gorako balioarekin. Kontratu horren barruan, tutu hariztatuen akaberarako fabrika bat eraikiko du Abu Dabin.
Gaur egun, Aiaraldean ez ezik, Tubacexek ekoizpen eta zerbitzu guneak ditu Espainiako estatuan, Italian, AEBetan, Indian, Thailandian, Saudi Arabian, Dubain, Norvegian, Kanadan, Singapurren, Guyanan, Kazakhstanen eta Brasilen.
Hain zuzen ere, Amurrioko eta Laudioko fabriketan 236 eguneko greba mugagabea egin zuten 2021ean, enpresak ezarri nahi zuen enplegu-erregulazioko espedientearen aurka. Borroka luze eta historikoaren ostean, langileek lortu zuten 150 kaleratzeak bertan behera geratzea.
Horrez gain, aipatzekoa da atzo egin zituztela hauteskunde sindikalak Tubacexeko Aiaraldeko hiru lantegietan. ELAk lortu zuen bozen gehiengoa, eta LAB izan da gorakadarik handiena izan duen sindikatua, “bigarren indarra boto kopuruan”.