Iragan astearen amaieran iragarri zuen Tubacexek azken 14 urteetako emaitzarik onenak lortu zituela 2022an. Datu positibo horiek isla izan dute baita multinazionaleko kontseilari eta goi-kargudunen dieta eta soldatetan ere, igoera nabarmenak egon baitziren iaz arlo horretan. Guztira 4.431.000 milioi euro banatu zituzten, aurreko urtean baino 1.016.000 euro gehiago.
Hori ondorioztatu daiteke Tubacexek berak Balore Merkatuaren Espainiako Batzordera igorri berri dituen txostenetako datuak ikusita.
2,78 milioi euro zuzendaritzako kideentzat
Dokumentu horien arabera, enpresa-taldeak 2.780.000 euro banatu zituen zuzendaritzako 9 kideen artean, aurreko urtean baino 814.000 euro gehiago.
Hauek dira zuzendaritzako kide horiek:
- Manuel Sarabia Figueroa (HR Corporate Director and MD Trading and Services)
- Anton Azlor Villa (Commercial Corporate Director)
- Iker Azkargorta Viteri (Managing Director Big Pipes&Fittings)
- Diego Herrero De La Torre (Innovation Corporate Managing Director)
- Guillermo Ruiz-Longarte Perez (Chief Financial Officer)
- Javier Lorenzo Santiago (Managing Director Americas)
- Celestino Danis Basurko (Managing Director Steel&Extrusion)
- Miguel Gomez Lacabex (OIM and M&A Director)
- Ajay Sambrani (Asia&Middle East Managing Director)
Txostenak ez du zehazten zehazki zenbat diru jaso zuen goi-kargudun bakoitzak, baina aipatzekoa da 2021ean baino kide bat gutxiago dagoela zerrenda horretan. Hau da, diru gehiago banatu dute pertsona gutxiagoren artean.
1,64 milioi euro administrazio kontseiluko kideen artean
Antzeko gauza gertatzen da Administrazio Kontseiluko kideen artean: 13 kontseilari izatetik 12 izatera pasa ziren. Dieta eta soldaten zenbatekoak, aldiz, igo egin ziren: 1.647.000 euro jaso dituzten orotara 2022an, aurreko urtean baino 202.000 euro gehiago.
Hemen ikusi daitezke egungo administrazio kontseiluko kideak eta urte bakoitzean jaso dutena:
Aipatzekoa da Tubacexek Aiaraldeko lantegietako langileen soldatak jarri zituela jomugan 2020an, bertako 150 langileren “soldatak” aurreztea planteatu zuenean.
Ondoren etorri zen langile kopuru hori kaleratzeko asmo irmoa, eta enpresak argudiatu zuen hori egitea “funtsezkoa” zela eskualdeko fabriken etorkizuna bermatzeko. Baina beharginek buelta eman zioten egoerari, 236 eguneko greba mugagabe historikoa burututa.