Tubacex hainbat aldiz agertu da komunikabideetan azken orduetan, eta ez soilik 2021ko grebagatik auziperatutako pertsonen epaiketengatik. Izan ere, multinazionalak enpresa-mugimendu garrantzitsua iragarri du gaur. Akordioa sinatu du Khalifa Economic Zones Abu Dhabi – KEZAD Group erakundearekin (Abu Dhabiko zentro ekonomiko eta industrial integratua), fabrika berria eraikitzeko Arabiar Emirerri Batuetako hiriburuan.
Akordio horren bidez, 50.000 metro karratuko lursail bat lagatu diote Tubacexi, lantegi berria eraiki dezan. Hodien akabera eta hariztatzea egingo dute bertan, 150 langilerekin. Multinazionalaren asmoa da fabrika 2024aren amaierarako martxan egotea.
Jesus Esmoris Tubacexeko zuzendariak hartu zuen parte akordioaren sinaketan, Arabiar Emirerri Batuetako hainbat ordezkari politikorekin batera (bertako Industria Ministroa, besteak beste).
50.000 metro karratuko lursail bat lagatu diote Tubacexi, lantegi berria eraiki dezan.
Modu horretan, Tubacexek beste urrats garrantzitsu bat eman du iaz iragarri zuen akordioaren gauzatzean. Duela urtebete iragarri zuen enpresa-taldeak bere historiako kontraturik garrantzitsuena sinatu zuela Arabiar Emirerri Batuetan, 10 urtetan 30.000 altzairu tona ekoizteko herrialde horrentzat.
Esmorisen hitzetan, Tubacexek “fabrikazio-teknologia aurreratu eta iraunkorrenak” ezarriko ditu Abu Dhabin, “Arabiar Emirerri Batuek beharrezkoa duten funtsezko osagai baten hornidura bermatuz, gas naturalaren ekoizpenean gero eta helburu handiagoak lortzera bidean”. Multinazionaleko buruaren ustez, herrialdeak dituen helburu horiek “berebiziko garrantzia” dute “trantsizio energetikoaren panoraman”.