Dozenaka lagun bildu dira gaur goizean Gasteizko epaitegien aurrean, epaiketa izan duen Tubacexeko langile auziperatuari elkartasuna adierazteko. Behargina 9:45ak pasata sartu da Justizia Jauregira bere abokatuekin, txalo eta animo oihuen artean.
Tubacexeko langileez gain, eskualdeko zein Gasteizko hainbat herritar ere batu dira elkarretaratzean. Baina babes keinu bereziena askoz urrunagotik iritsi da, Cadizetik (Andaluzia), hain zuzen. Bertako metaleko sektoreko bi ordezkari sindikal bertaratu dira mobilizaziora, pankarta propioarekin. Modu horretan eskertu nahi izan dute Tubacexeko langileek Cadizeko metalaren greban bertaraino eginiko elkartasun bidaia:
Akordio proposamena
Auziperatutako langileak Aiaraldea Komunikabideari adierazi dionez, akordio proposamena jaso du fiskalaren aldetik, epaiketa hasi baino lehen. Zehazki, akusazioa autoritatearen aurkako atentatu delitutik erresistentzia delitura jaistea proposatu diote beharginari, baina honek epaiketarekin aurrera jarraitzea erabaki du, absoluzio soilik onartuko duelako. Langileaz eta bere lekukoez gain, hainbat ertzainek deklaratu dute epailearen aurrean, eta epaiaren zain geratu da auzia.
Gaurkoa izan da Tubacexeko greba mugagabea dela eta egiten den bigarren epaiketa. 2022ko azaroan Aintzane Mendia epaitu eta absolbitu zuten. Datorren irailean, aldiz, eskualdeko 3 langile gazte epaituko dituzte, 4 urte eta 7 hilabeteko kartzela zigor eskaerekin.
Horrez gain, beste bi pertsona daude epaiketaren dataren zain. Orotara, 20 urte baino gehiago eskatu dituzte kartzela zigorretan, igandean Laudioko Tubacexeko lantegiaren aurrean eginiko agerraldian nabarmendu zutenez:
🔴 𝐀𝐃𝐈!🔴
— Aiaraldeko Greba Batzordea (@AiaraldeaGreba) June 12, 2023
Tubacexeko auziperatuetako bat ostegun honetan (ekainak 15) epaituko dute, eta irailean beste hiru pic.twitter.com/HBwBwjYaRh