Hamaika buruhauste sortu ditu eskola garraioak ikasturtearen hasieran landa-eremuan. Lehenik eta behin, Eusko Jaurlaritzaren eta enpresen arteko adostasun faltak eragin zuen hainbat familia zerbitzurik gabe geratzea irailean. Arazo hori konpondu ostean, ordea, igeriketa klaseena etorri zen landa-eremuko ikastetxe publikoetara, Arabako Foru Aldundiak adierazi baitzuen ez zuela garraio hori bere gain hartuko.
Gauzak horrela, Arteko Gure Ama Ikastetxeko eta Etxaurren Ikastolako gazteek eskola ordutegitik kanpo jo behar zuten klase horiek hartzera, Aldundiak azaldu baitzuen eskola ordutegi barruko jarduera guztiak Eusko Jaurlaritzako Hezkuntza Sailaren eskumenak zirela.
Dirulaguntza
Dena den, pasa den astean Arabako Foru Aldundiak jakinarazi zuen dirulaguntza sortuko duela eskolaz kanpoko jarduerak finantzatzeko. Horretarako, laguntza-lerro berria diseinatu dute Lurralde Oreka eta Lurralde Antolamendu Sailak eta Kultura eta Kirol Sailak.
"Jakin badakigunez beharrezkoa dela inguruko beste udalerri batzuetara joatea kirol-jarduerak egin ahal izateko, betiere gure haurrek eta gazteek kirola egiteko duten eskubidea gailenduz, beren bizitzaren eta hezkuntzaren garapenaren funtsezko zati gisa, Guraso Elkarteei laguntzeko lerro berri hau sortzearen alde egin dugu, jakin baitakigu horrek eskola-orduetan eskola-kirola egitea erraztuko diela Arabako ikasleei", adierazi du Lurralde Oreka eta Lurralde Antolamenduko diputatu Anartz Gorratxategik. Izan ere, sail horen mende egongo dira laguntzak datorren urtean.
Guraso elkarteentzako buruhauste gehiago, baina albiste ona
Aiaraldea Komunikabideak eskualdeko Guraso Elkarte kaltetuenarekin jarri da harremanetan, Artziniegakoarekin, alegia.
Artziniegako gurasoek eskola ordutegitik kanpo egin behar zuten igeriketa ikastaroa, baina Arabako Foru Aldundiak ahalbidetuko duenez, eskola ordutegi barruan izango da azkenean.
Horrek aldaketak ekarriko ditu egungo planteamenduan, ostegun arratsaldetan eskatu baitzuten Amurrioko Kiroldegiko igerilekua. Dena den, familiek positiboki baloratu dute neurria.
Berez, konpondu gabeko hainbat arazo ekidingo dituzte ikastetxeari esker: ez dute begiralerik kontratatu beharko, adibidez.
Gurasoek azaldu dute dirulaguntzak bestelako prozedura ezarri duela -ikasleen aitek eta amek eta ikastetxeek kontratatu beharko dute autobusa eta gero finantzazioa eskatu-.