2024aren hasierarekin, igo egin dira AP-68 autobideko prezioak. Altubeko ordainsaria 25 zentimo garestitu da, 6,25 eurotik 6,5 eurora igaroz. Aretako peajea, aldiz, 10 zentimo gehiago balio du orain, 2,3 eurotik 2,4 eurora pasata. Modu horretan, Gasteiztik Bilbora joateko 8,9 euro ordaindu behar dituzte ibilgailu arinen gidariek.
Dena dela, igoera hau iaz pairatutakoa baino leunagoa izan da. Izan ere, 2023aren hasieran azken urteetako igoera handiena aplikatu zuten bi bidesarietan.
AP-68 autobidearen esleipena duen enpresa arduratu da igoera aplikatzeaz. Laudio-Bilbo tartea da Espainiako estatuko errepide sarearen laugarren zatirik garestiena, AP-68 dohainik plataformak behin baino gehiagotan aipatu duenez.
2026. urtean amaituko da kontzesioa. Arabako zein Bizkaiko foru aldundien eskuetara pasako da orduan autobideen kudeaketa, baina erakunde hauek oraindik ez dute zehaztu prezioak mantenduko dituzten edo ez.
Tren zerbitzuko abonu berriak, eskura
Tren zerbitzuan ere aldaketak daude urte berriarekin batera. Abenduaren 31an iraungi ziren Bilbo eta Urduña arteko lineako abonuak, eta berriak eskuratzeko aukera dago dagoeneko, 2024ko lehen lauhilekorako. Hemen ikusi daiteke horri lotutako informazio guztia.
