Kutxazain automatikoak instalatzeko laguntza-lerro bat atondu du Eusko Jaurlaritzak, finantza erakundeek mota horretako azpiegiturak ireki ditzaten landa eremuetan. Euskal Autonomia Erkidegoko 64 udalerritan jarri nahi dituzte kutxazainak; Aiaraldeko hirutan, besteak beste: Aiatan (Luiaondon), Okondon eta Arrankudiaga-Zollon.
Pedro Azpiazu Ekonomia eta Ogasuneko sailburuak iaz jakinarazi zien finantza-erakundeei ekimen hau martxan jarriko zutela, "landa eremuen hazkunde- eta biziberritze-prozesuan" laguntzeko.
Arabako Navaridas herrian aurkeztu zuten ekimena iragan astean, Kutxabanken kutxazain berri baten inagurazio ekitaldia baliatuta. Bertan egon zen Hernando Lacalle laudiorra, Finantza eta Aurrekontuetako sailburuordea dena. Berak azaldu zuenez, "benetako finantza-inklusio baten alde lan egitea" izango da helburua. "Izan ere, banku-zerbitzuak ematen dituzten erakundeen presentziak aurrezkia, familien inbertsioa eta enpresa-proiektuen garapena sustatzen du, eta horrek, aldi berean, eremu osoaren aurrerapen ekonomikoari laguntzen dio", aipatu zuen.
Azken urteetako joera
Kutxazainen gabeziak gorabehera asko sortu ditu Aiaraldean azken urteetan, Kutxabanki dagokionez batez ere. Finantza erakunde horrek eskualdeko hainbat bulego eta kutxazain kendu ditu azken urteetan. Azken urratsa iaz eman zuen, Latiorron zegoen kutxazaina kenduta.
Horren aurrean, bizilagunen protestak egon dira, Okondo, Areta zein Artziniegako bulegoak itxi zituztenean, besteak beste.