Duela zenbait aste kendu zuen Kutxabankek Latiorron zuen Kutxazaina. Bertako bulegoa 2016tik darama itxita, baina dirua ateratzeko makinak funtzionatzen jarraitzen zuen, orain arte.
Azken murrizketa horrekin, azken urteetako joeran sakontzen dihardu finantza erakundeak. 2013tik 2020ra bitartean 239 kutxazain kendu zituen, eta 1.426 langile kaleratu eta 310 bulego itxi zituen 2012tik 2020ra bitartean. 2017an itxi zituzten Areta eta Okondokoak, bizilagunen hainbat protesten artean.
Artziniegako bulegoa ere denbora luzez egon zen itxita COVID-19aren pandemia hasi zenean. Aurrez aurreko zerbitzua berreskuratzera iritsi zen handik denbora batera, baina murrizketa nabarmenekin.
Lau bulego eta 13 kutxazain geratzen zaizkio Kutxabanki eskualdean
Latiorroko Kutxazainaren itxierarekin, Laudioko herrigunean toki bakarra geratu zaie Kutxabanken bezeroei dirua atera eta bestelako tramiteak egiteko: Alberto Acero plazako bulegoa.
Bost kutxazain daude bertan guztira. Gune hori 2021ean ireki zuen Kutxabankek, Zumalakarregi eta Nerbioi kaleko sukurtsalak itxi ostean.
Berehala hasi ziren nabaritzen bi bulegoak bakarrean fusionatzearen ondorioak, jende-ilarak eguneroko ogia bilakatu baitziren zenbait hilabetez. Aretako kutxazainak, bere aldetik, funtzionatzen jarraitzen du, baina arazo teknikoak dituela salatu dute hainbat bizilagunek.
Gauzak hala, Aiaraldean lau bulego baino ez zaizkio geratzen Kutxabanki: Urduñakoa, Amurriokoa, Artziniegakoa eta Laudiokoa. Kutxazainak, aldiz, 13 dira eskualdean: Bana Okondo, Artziniega, Areta eta Orozkon, bina Urduña eta Amurrion eta bost Laudion.