Tubacex enpresako greban parte hartu zuen beste herritar bat absolbitu dute eta jadanik badira lau, epaitutako zazpien artean. Kasu honetan, azaroan zigortu zuten konpainiako langilea eta sei hilabeteko espetxe zigorra eta bi isun ezarri zizkion Beatriz Ledo Languilla epaileak, ustez, ertzain bat erasotzeagatik 2021eko otsailaren 23an, grebaren lehen istiluetan.
Aiaraldea Komunikabideak bertatik bertara jarraitu zuen epaiketa eta sententziaren hutsune guztiak adierazi zituen epaia argitaratu eta gutxira. Orain, martxoaren 12ko datarekin, Jesus Alfonso Poncela Garcia epaileak (akusatuaren helegitea baloratu duenak) aipatutako kontraesan guztiak azaleratu ditu bete sententzian eta ondorioztatu du ez dagoela frogarik grebalariaren kontra. Gauzak horrela, in dubio pro reo irizpidea baliatu eta absolbitu du.
Bideoak erabakigarriak izan dira
Helegitean bertan azaltzen duen moduan, Jesus Alfonso Poncela Garcia epaileak soilik argitu behar zuen zigortuak agentea benetan erasotu zuen, akusatuak ez baitzuen ukatzen greban eta mobilizazioan parte hartu izana. Horretarako, defentsak aurkeztutako bideoak eta deklarazioak aztertu behar izan ditu eta bere ondorioa argia izan da: 22166 ertzainak itxura sinisgarriko adierazpenak egin arren, grabatutako irudiek gezurtatzen dute berak esandakoa.
Hemen ikusi daiteke epaiketan aurkeztutako bideoa osorik:
Hori probatzeko, Beatriz Ledo Languilla epaileak bere sententzian adierazitako argudio guztiak desmuntatu ditu Garcia Poncelak.
Hasteko, epaileak nabarmendu du epaitzen ziren gertakari guztiak Ertzaintzak egindako lehen oldarraldian jazo zirela eta horiek guztiak grabatuta zeudela, Ledo Languillak iradokitakoaren kontra. Grebalaria zigortu zuen epaileak arrazoitu zuen erasoa ez zegoela islatuta bideoetan eta beste kronologia batean kokatu zuen, ikus-entzunezkoetatik kanpo.
Poncela Garciak, aldiz, poliziaren eta defentsaren deklarazioak hartu ditu eta ondorioztatu du lehen oldarraldian gertatu zirela kolpeak eta sekuentzia hori guztia grabatuta zegoela defentsak baliatutako bideoetan.
Ertzain baten hitza ez da nahikoa grabatutako gertakariekin kontraesanean badago
Lehen argudio hori ezeresean utzita, Poncela Garciak lehen oldarraldian jazotakoa xehetasunez birpasatu du bideoen bitartez eta azpimarratu du egia dela erasoa jasan zuela agenteak, baina ez akusatuaren aldetik.
"Grabaketa anitzek ahalbidetzen dute gertakarien sekuentzia osoa ikustea eta akusatua ez da agertzen ertzainak erasotzen", adierazi du epaileak.
Are gehiago, bideoei esker, epaileak azpimarratu du grebalaria gatazka eremutik aldendu zela, baina ez agenteetatik, behin istiluak bukatuta. Gainera, Ertzaintzak atxilotu zuenean ez zuela erresistentziarik egin aipatu du. "Bera erasotzailea izan balitz, bestelako jarrera aurreikusi zitekeen bere aldetik, agenteetatik aldenduta eta identifikatua eta atxilotua izateko arriskua ekidinda", idatzi du Jesus Alfonso Poncela Garciak.
Finean, epaileak berak azaldu duenez, "biktimaren deklarazioak eta froga dokumentalak (bideoek) agerian uzten dute identifikazioan erratu zela".
Zazpi akusatu, lau absolbitu
Tubacexeko greba luzearen harira, zazpi langile eta herritar epaitu dituzte, gehienak Ertzaintzak berak salatuta, agenteak erasotzeagatik. Horietatik lauk absoluzioa lortu dute. Aintzane Mendia enpresako langilea izan zen lehenengoa, iaz beste bi gazte (zazpi urteko espetxe zigor eskaera zuten-ak) eta azkena grebalari hau, lehenengo sententzian zigortu zutena.
Zigortutako beste hiru herritarren artean, bik akordioa adostu zuten eta hirugarrena atxiloketan erresistentzia egiteagatik zigortu zuten.