Zenbait hedabidek atzo jaso zuten Tubacex konpainia multinazionalak Abu Dabin eraikitako lantegiaren %49ren erosketa ahalbidetu diola Mubadala Investment Company-ri, Arabiar Emirerri Batuko funts subiranoari, hain zuzen.
Zenbait kazetari modu baikorrean mintzatu ziren operazioari buruz eta aipatu zuten horrek agian inbertsioak ekarriko dituela Aiaraldeko lantegietara. Langile batzordeko ordezkarien artean, ordea, giroa ez da horren positiboa. Euren aburuz, inoiz ez da albiste ona enpresa baten desinbertsioa, erabakimen eskubidea ezezagun urrunen artean banatzen baita.
Horrez gain, eta azalpen gehiago izan gabe, sindikatuek ez dute 139 milioi euro horiek eskualdeko lantegietan bukatuko dutenaren bermerik. "Momentuz, diru hori akziodunena da", adierazi du iturri sindikal batek.
Iturri berak, edonola ere, onartu du eragin anbibalentea duela erosketak: "Alde batetik, Abu Dabiko lantegian OCTG teknologia baliatzen da, eta hodi mota horiek dira Tubacexek gehien saltzen dituena. Arabiar Emirerri Batuan egiten badute Amurrion gauzatzen dena, lan zama kentzen da. Baina, bestalde, Abu Dabin OCTG teknologia aplikatzen da Aiaraldetik bertara iristen diren tutuetan. Hau da, OCTG prozesua ekoizpenaren amaierako urratsa da, beste guztia hemen egin daiteke eta horrek lan karga ekar dezake, auskalo".
Mozkin gehiago Tubacex taldearentzat
Argi dagoen gauza bakarra da Tubacexek etekin gehiago emango dizkion operazioa burutu duela. Izan ere, 2022an iragarri zuen Abu Dabin eraikiko zuela lantegia. Horri esker bermatu zuen 10 urtez 30.000 altzairu tona ekoiztea ADNOR enpresarentzat, hau da, herrialdeko petrolio konpainiarentzat.
Azpiegiturak eraikitzearen inbertsioa 100 milioi eurokoa izango zela adierazi zuen konpainiak eta orain erdia baino gutxiago (%49) saldu du 139 milioi euroren truke. Multinazionalak berak ezarritako kronogramaren arabera, 2024ko amaieran hasiko da lanean faktoria, 150 beharginekin. Hortaz, 2025etik aurrera ikusiko da bere eragina, positiboa edo kaltegarria, Aiaraldean.