Astelehenean Oscar Puente Santiago Garraio eta Mugikortasun Jasangarriko Ministroak arlo horretako Senatuko batzordean parte hartu zuen eta Josu Estarrona EH Bilduko senetariak zenbait galdera egin zizkion. Besteak beste, itaundu zion ea asmoa zuen neurriak hartzeko aldirikoen zerbitzua fidagarria eta puntuala izan dadin Bilboko inguruetan, hau da, Aiaraldea barne. Izan ere, Estarronak gogoratu zion trenak etengabe uzten dituztela bertan behera eta inolako jakinarazpenik egin barik.
Ministroak erantzun zuen arazo nagusia trenak direla, eta hori konpontzeko urratsak egingo dituztela: "Tren berriak eramango ditugu eta, tren horiekin, beste zerbitzu-mota bat. Ordutegiak eta maiztasunak hobetuko ditugu. Beraz, inbertsioa handitu egingo da, horretan gaude Euskadin eta, zehazki, trenen ordutegietan, zuk aipatu bezala. Halaber, tren berriak sartuko ditugu Euskadiko aldirikoen sarean, eta, beraz, hobetu egingo ditugu eskaintzen ari garen maiztasunak eta ordutegiak".
Halaber, Espainiako Gobernuko ordezkariak aitortu zuen egungo zerbitzua ez dutela behar bezala eskaintzen: "eskuragarri dagoen materialarekin, ahal dugun zerbitzua ematen dugu. Ez badugu material nahikorik maiztasunak hobetzeko, egiten ari garena da, jakina, puntako orduetan zentratzea eta, agian, beste orduak alde batera uztea, zure mintzaldian aipatu duzun bezala".
Sindikatuen mesfidantza
Aiaraldea Komunikabidea zenbait iturri sindikalekin jarri da harremanetan eta ez dituzte oso modu baikorrean hartu ministroaren adierazpenak. Izan ere, ez du zehaztu noiz eta nola egingo dituzten inbertsioak eta, gainera, zalantzan jarri dute Bilboko aldirikoen zerbitzuan sartuko dituzten tren berrien kalitatea: "Hona ekarri ohi dituzten unitateak Madril eta Bartzelonan kentzen dituztenak dira. Hau da, hamabost edo hogei urte dituzte jadanik".
Gainera, nabarmendu dute azken asteetako anabasa Bilbon sartu den gerente berriaren ardura izan dela, txarto kudeatu dituelako gidariek iaz egindako lan-orduak, maiatzean librantza guztiak hartzera behartuta.