Datorren azaroaren 30ean urtebete igaroko da Greba Feminista Orokorrak "zaintza sistema publiko eta komunitarioaren alde" milaka lagun kalera atera zituenetik. Efemeridearen testuinguruan, Euskal Herriko Mugimendu Feministak mobilizazio eguna antolatu du larunbaterako, eta eskualdean ere oihartzuna izango du deialdiak.
Amurrioko Emakumeon* Sareak azken urtean udalerrian dauden zaintzarako baliabideak publifikatzeko eta bertako langileen egoera duintzeko lan lerroa abiatu du
Urtebete mugimenduan
Azaroaren 30ekoa ez da urtemuga soil bat. Argi utzi zuen mugimendu feministak greba orokorra prozesu baten abiapuntua baino ez zela, "denon bizitzak erdigunean" jarriko zuen prozesu baten hasiera, alegia. Euskal Herriko eragile feministek behin eta berriz aldarrikatu dute zaintzen krisia agenda politiko eta sozialean sartzeko urjentzia.
Hain zuzen ere, tokian toki, zaintza lanen aitortzan urratsak emateko prozesuak abiatu ziren grebaren biharamunean. Horren adibide da, esaterako, Amurrioko Emakumeon* Sareak azken urtean udalerrian dauden zaintzarako baliabideak publifikatzeko eta bertako langileen egoera duintzeko abiatutako lan lerroa.
2024ko azaroaren 30a
Azken urtean Euskal Herrian, Araban zein herriz herri egindako lanaren berri emateko batzar informatiboak eta mobilizazioak egingo dituzte larunbat honetan (azaroak 30) Laudion eta Amurrion. “Azken urte honetan ez gara geldi egon. Emandako urratsen eta etorkizuneko erronken berri emango dugu asanbladetan”, azaldu diote Aiaraldea Komunikabideari mugimendu feministako kideek.
Amurrion 12:30ean elkartuko dira, Villa Fe eraikineko Amurrioko Emakumeon* Sarearen lokal berrian. >Bilera informatiboa egingo dute bertan. Horren ostean, 13:00ean, mobilizazioa abiatuko da Juan Urrutia Plazatik.
Laudion "herri mailako antolakuntzan urrats berriak emateko" baliatu nahi dute goizeko hitzordua
Laudion "Zaintzen errepublika" deitu duten espazioa zabalduko dute Herriko Plazan, 11:00etatik aurrera. Elkartzeko gunea izango da hori. 11:30ean hamaiketakoa eskainiko dute eta 12:00etan batzar informatiboa egingo dute. Laudioko mugimendu feministatik adierazi dute "herri mailako antolakuntzan urrats berriak emateko" baliatu nahi dutela goizeko hitzordua. Azkenik, Laudioko herriari zuzendutako manifestua irakurriko dute, 14:00etan Herriko Plazan.
Hitzorduak Laudion eta Amurrion jarri badituzte ere, Aiaraldeko Mugimendu Feministak eskualde osoko herritarrei luzatu die ekimenetan parte hartzeko deia. Azpimarratu dute ere ekimen mistoak direla azaroaren 30ekoak, eta gizonezkoei ere egin diete deia; "asanbladetan entzunez, eta mobilizazioetan parte hartuz".
Kalera ateratzearen garrantzia nabarmendu du mugimendu feministak: "Zaintza lanak aitortzeko, zaintza sistema publiko eta duinaren alde, ezinbestekoa da kalera ateratzea eta saretzea".
