Arabako Txakolina Jatorri Izendapena osatzen duten zortzi upategiek beste bi mahats barietate baliatu ahalko dituzte orain ekoizpenean: Pinot Noir eta Cabernet Franc. Araudiaren baldintzen plegua berrikusi dute horretarako, egokitzea eta eguneratzea beharrezkoa zela iritzita.
Hala adierazi dio Mariano Alava Arabako Txakolinako presidenteak Aiaraldea Komunikabideari, eta azaldu du bi barietate horiek gehitzeak ez duela esan nahi hemendik aurrera ekoizpenean ezinbestean erabiliko direnik, baizik eta horretarako aukera zabalik dutela orain txakolindegiek.
Izan ere, azken urteetako klima-aldaketak eragin zuzena izan du Arabako Txakolinaren uztetan, mahastien ziklo-begetatiboa aztoratu duelako. Hortaz, beste baldintza batzuetan ondo erantzuten duten barietate gehiagori irekia egoteak lasaitasuna dakarkie ekoizleei. Gainera, merkatuaren eskari posibleei erantzuteko aukera ere emango die.
Dena den, ez dugu ahaztu behar Hondarribi Zuri eta Hondarribi Beltz mahats barietateak direla Aiaraldeko txakolindegietan nagusi, eta ardoaren %80 osatu behar dutela gutxienez, eta ekoizleren batek barietate hauek txertatu nahi izanez gero, gainontzeko %20 horren baitan egin beharko lukeela.
Alavak azaldu duenez, "Jatorrizko Izendapenaren araudian edozein aldaketa gehitzea beti da prozesu nekeza". Duela urtebete hasi ziren pleguaren gaineko aldaketak proposatzen, baina hainbat dira igaro beharreko galbaheak: "Eusko Jaurlaritza, Madril, Bruselas... Hainbat agentek eman behar dute onarpena, alegaziorik egin gabe, egokitzapenekin aurrera egin ahal izateko". Nolanahi ere, baikor agertu da presidentea, eta moldaketek aurrera egingo dutela ziur dago, "oso zuhurrak" izan baitira.
