Elkarrekin Podemosek publikoki adierazi du galdera sorta erregistratu dituela Arabako Batzar Nagusietan landa eremuko paper tea kartoi bilketako zerbitzuari buruz. Izan ere, udan aurreko enpresari eten zioten kontratua eta Garbialdi konpainiarekin sinatu zuten berria. Hala ere, David Rodriguez taldeko bozeramaileak azaldu du lan hori ez dagoela abian.
Gauzak horrela, Elkarrekin Podemosek Saray Zárate Fernández de Landa Garapen Ekonomiko eta Jasangarritasun Diputatuari sei galdera bideratu dizkie. Hasteko, jakin nahi dute zergatik ez den konpondu irailean oraindik zerbitzu horrekin dagoen arazoa.
Horrez gain, bilketa kamioiak noiz hasiko diren pasatzen itaundu dute. Halaber, Elkarrekin Podemosek jakin nahi du zein neurri jarriko diren abian gaiari dagokionez.
David Rodriguezentzat gatazkaren muina azpikontratazio politika da, bere ustez prekarizazioa eta emaitza penagarriak ematen baititu.
Enpresa berria, baina antzeko egoera
Uztailaren erdialdean azaleratu zen Arabako landa eremuan izandako gatazka papera eta kartoia birziklatzeko orduan. Foru Aldundiak jakinarazi zuen Daorje enpresaren kontratua etengo zuela eta hainbat espediente ireki zizkiola baldintzak ez betetzeagatik. Eskualdeari dagokionez, Artziniegako Udala izan zen bereziki kritikoa zerbitzuaren egoerarekin.
Horrela, foru erakundeak azaldu zuen Garbialdi enpresak hartuko zuela ardura eta kontratuan hobekuntza ugari ezarri zituela. Gainera, abuztuan konpainia berria lanean zegoela zabaldu zuten, baina, hala ere, zenbait herritar kexu agertu dira abuztuaren amaieran bertan. Albiste honen irudia, esaterako, Luiaondon hartu zuen aiaraldear batek hilabete amaieran.