Arabako Batzar Nagusietako politika orokorrari buruzko saioak aurrera egin du gaur eta Elkarrekin Podemos oso modu kritikoan mintzatu da Aiaraldeko egoerari buruz. Lehenik eta behin, Ramiro Gonzalez Ahaldun Nagusiari gogoratu dio Maderas de Llodioko langileek greba mugagabea abiatu zutela atzo 39 kaleratze ekiditeko.
Edonola ere, taldearen kritika nagusiak beiraren sektorearen "hondamendiari" lotuta etorri dira. Izan ere, Gonzalezek atzo aipatu zuen albiste onak espero dituela Guardian multinazionaleko lursailean, baina Elkarrekin Podemosek egotzi dio ezer ez egitea itxiera hori gelditzeko.
Hain zuzen, Elkarrekin Podemosek azaldu du Guardianek Glavista saldu ziola Parter Capital funts putreari 2020an eta horren ondorioz 240 lanpostu galdu zirela geroago. David Rodriguez koalizioko bozeramaileak galdetu dio Ramirezi ea non zeuden Arabako Foru Aldundia eta Eusko Jaurlaritza enpresaren jarraipena bermatzen zuen industria proiektua aurkeztu zenean.
Izan ere, proiektu hori ez zen bideragarri izan Guardianek ez zuelako onartu lursailak saltzea inbertsoreari. "Arabako Foru Aldundiak eta Eusko Jaurlaritzak ez zuten esku hartu une horretan", salatu du Rodriguezek.
"Guk jakinarazi genuen hori hasiera baino ez zela izango, eta gero gertatu zen beste 170 lanpostuen galdera, eta orain esaten diguzu Guardianen instalazioetan jarduera berriko proiektu serioa abiatuko dutela. Oso berandu, Ahaldun Nagusi jauna", amaitu du Rodriguezek.
EH Bilduk ere Aiaraldea hizpide
Halaber, Xabier Valdor EH Bilduko kideak Aiaraldean bizi den egoerari buruz hitz egin du eta azpimarratu du bai eskualdean zein Arabar Errioxan "beren etorkizuna bermatuko duen premiazko esku-hartzea" behar dutela.