Mendi zentral eolikoa sustatzen ari den enpresak aldaketa nabarmenak egin nahi ditu energia egitasmoan eta, esaterako, zazpi aerosorgailu instalatzetik, hiru eraikitzera igaro nahi du.
Hain zuzen, proiektutik kendu dituen hiru aerosorgailu horiek Orozkotik gertu zeuden biak eta Elexazar aztarnategi arkeologikotik hurbil zegoena dira.
Edonola ere, bestelako aldaketak ere daude eta deigarriena da, nahiz eta aerosorgailu kopurua murriztu, ekoiztu nahi duten energia handituko dela. Lehen 30 MW ziren eta 7,8 MWra igota lau horien ekoizpen gaitasuna, 31,2 MWra igoko litzateke gaitasuna.
Halaber, beste aerosorgailu baten kokapena mugitu nahi dute; zehazki, Kuskumendi eta Osoño auzunearen ingurutan zegoena.
Izapideak hasieratik
Industria, Trantsizio Energetikoaren eta Jasangarritasun Sailaren jakinarazpenak ezustean hartu du Aiaraldeko Mendiak Bizirik taldea. Plataformak gogor kritikatu du nola kudeatzen ari diren zentral eolikoak. Hain zuzen, duela gutxi prentsa oharra zabaldu zuten horri buruz.
"Duela gutxi Arabako Foru Aldundiak azaldu zuen bere gain hartuko zuela 'Mendi' proiektuaren Plan Berezia egitea eta, bat-batean, aldaketa oso garrantzitsuak iragarri dituzte. Ezin liteke Plan Bereziak balio izatea bi proiektuetarako, oso ezberdinak baitira. Prozedura osoa zerotik abiatu beharko lukete. Edonola ere, badirudi adarra jotzen ari direla, herritarrontzat eta udalentzat lan handia da espediente hauek lantzea alegazioak egiteko eta enpresek nahi dutenean aldatzen dituzte, Eusko Jaurlaritzak eta Foru Aldundiek ezer esan gabe", adierazi du taldeak.
