Aiaraldeko bizilagun bat epaitu zuten iragan azaroaren 19an, "AMA Desokupa enpresari aurre egitea egotzita". Granadako desokupazio enpresa da AMA Desokupa, eta hainbatetan bisitatu zuen eskualdea iragan udaberrian, Amurrioko familia bat etxegabetzeko asmoarekin. Halaber, enpresa horren presentziak protesta eta mobilizazioak eragin zituen egun horietan, eta ugariak izan ziren herritarren eta desokupazio enpresako kideen arteko talkak.
Hain zuzen ere, talka horietako bat izan da auzitegietara iritsi dena. Angela Mendoza AMA Desokupa enpresako buruak berak jarri zuen eskualdeko bizilagun baten aurkako salaketa, koakzioen eta mehatxuen delitua leporatuta.
Epaiketa eta absoluzioa
Epaiketan bi aldeak entzun ostean, desokupazio enpresak salatutako bizilaguna absolbitu du epaileak, aipatutako delituak leporatzeko inongo frogarik ez dagoela ebatzita. Are gehiago, desokupazio enpresako kidearen testigantza "inkongruentea eta kontraesanez josia" dagoela jaso du epaileak sententzian, auto judizialean azaldutakoarekin bat ez datorrela nabarmenduta.
