Guztira 75 kilometro egingo ditu lekukoak Aiaraldeko lurretan barrena. Erraz esaten da. Egin, ordea, ez dira hain erraz egiten. Kirolaren garapenak giza-gorputzaren gaitasunak ezinezkoak ziruditen ortzimugetara eraman dituen garai frenetiko hauetan, Aiaraldea Komunikabideak aurkitu du ibilbidea osatzeko gai den norbait: Julen Pagazaurtundua. Bakarrizketalari eta aurkezle laudioarraren laguntzaz, Korrikaren 24. edizioan egingo duen ibilbidearen bitxikeriak ezagutzeko aukera eskainiko du komunikabideak martxoaren 19an estreinatuko den bideo-seriean.
Julenekin Korrika izenburupean, korrika ganoraz egiteko sei pilula ekoitzi ditu Aiaraldea Komunikabideak
Julenekin Korrika
Julenekin Korrika izenburupean, korrika ganoraz egiteko sei pilula ekoitzi ditu Aiaraldea Komunikabideak. Pagazaurtunduak Artziniega, Aiara, Amurrio, Orozko, Laudio eta Arrankudiaga zeharkatuko ditu. Bidean, udalerri bakoitzeko herritarren laguntza izango du, lekukoaren bidelagun izateko gomendioak eta eskualdeko euskararen egoera aldi berean bilduz. Izan ere, eskualdea desorduetan bisitatuko duen Korrikaren edizio honetan aholku bat baino gehiagoren premia izango dute herritarrek. Hala nola, Artziniegako kale estuetan orkatilak nola ez bihurritu, Menagaraiko aldapa nola igo, Bergantzako bide zuzena nola jarraitu...