Euskal Herriko gehiengo sindikalak deitutako greba eguna da gaur eta deialdiak isla izan du Aiaraldean modu anitzetan. Lanpostura joan ez direnekin eta ateak ireki ez dituzten negoziekin batera, aipatzekoa da piketeen jarduera goizeko lehen ordutik.
Babes oso zabal izan du greba orokorrak, goizeko lehen ordutik eskualdeko industriaguneetan. Tubacexeko zuzendaritzak El Correo egunkariari eskainitako datuen arabera %75ekoa izan da jarraipena eskualdeko lantegietan.
Azken greba orokorretan baino askoz babes zabalagoa jaso du gaurko mobilizazio egunak merkataritza sekotrean ere. Amurrion komertzio guztiek itxi dute, banketxe bakan batzuk salbu. Laudion ere grebaren jarraipena zabla izan da hirugarren sektoreko negozioen artean.
Laudion Aiala Vidrion abiatu dute ibilbidea piketeek eta hor sortu da poliziaren eta grebalarien arteko lehen talka, ondorio handirik gabe.
Amurrion, aldiz, Saratxoko industriagunean ekin diote egunari tirabira aipagarririk gabe.
Laudioko piketea herrigunera jotzean etorri dira gatazka handienak. Lehenik eta behin, herritar bat identifikatu eta salatu dute errepidean egoteagatik.
Gero, Tubacexen bultzaka mugitu dituzte ertzainek piketeko kideak eta Eroskin grebalari bat atxilotzen saiatu dira. Azkenean eraman ez badute ere, bi akusazio direla medio ikertua izango dela iragarri diote.
Hain zuzen, merkatal gunean indarrez sartzea leporatu diote. Berez, piketeko talde bat barneratu da Eroskin propaganda banatzeko eta horrek eragin du tentsioa eta poliziaren agerpena. Grebalariek merkatarien iradokizuna jaso dute eta indar berezia jarri dute Eroski bezalako merkatal gune handiak irekita egon ez daitezen.
Amurrioko piketearen zati bat Murgara bertaratu da salatzeko behargin talde batek adierazi duela atzo ez zitzaiela utzi parte hartzen Etorki enpresan egindako bozketan grebari buruz erabakitzeko.
10:00etik aurrera piketeak herrigunean geratu dira, baina merkatari eta tabernari gehienek bat egin dute grebarekin eta batzuek euren aldarrikapenak plazaratu dituzte.
Argazkiak: Aimar Gutierrez Bidarte, Txabi Alvarado Bañares eta Aiaraldeko Greba Batzordea