Ttipi-ttapa, ttipi-ttapa... Aiaraldea Komunikabidetik ere hasi gara beroketa lanak egiten ostegun honetan Korrikak bisitatzen gaituenerako. Argazki eta bideo zaharren sareratzea, Julenekin Korrika bideo seriea... hainbat eduki joango gara partekatzen giroa berotzeko, horretarako berariaz prestatu dugun atari berezian.
Jarraipen bereziaren puntu gorena martxoaren 26tik 27ra bitarteko gauean iritsiko da. Orduan igaroko da Korrika eskualdetik, eta komunikabideko kideak gora eta behera arituko gara argazkiak zein bideoak egiten.
Zazpi orduko zuzeneko saioa
Baina ez hori bakarrik: plato bat ere atonduko dugu Laudioko Herriko plazako erabilera anitzeko aretoan. Zuzeneko emisio berezia egingo dugu bertatik, gaueko hamarretatik goizaldeko bostak arte (!). Ez da erronka makala, baina konpainia ederrean egingo dugu. Alde batetik, Izaro, Maddi eta Ane fitxatu ditugu berriz, Korrikaren aurreko edizioan esatari aritu zirenak. Bestetik, Bazter Itxia podcastekoak ere batu dira gaueko planera. Guztien artean saiatuko gara Korrikaren jarraipen maratonianoa burutzen.
Eta zu ere gonbidatuta zaude noski. Aulki batzuk egongo dira emisioa jarraitzeko, eta baita bestelako sorpresaren bat ere (pasta batzuk, kafea...).
Ez dakigu zehazki nola aterako den, baina egon ziur: ateratzen dena ateratzen dela, Aiaraldea.eus atarian jarraitu ahalko duzue.