EH Bilduk ez du Aiaraldeko Garapen Industrialerako Mahaiaren azken bi bileretan parte hartu, Tubos Reunidos eta Maderas de Llodioko langileek protestak egin dituztelako bilkuren aurrean. Gauzak hala, ohar baten bidez helarazi du alderdiak organo horri buruz duen iritzia.
Koalizio subiranistak azaldu duenez, bilera bat egin zuen iragan astean Aiarako, Artziniegako eta Laudioko alkateekin eta EH Bilduko Amurrio eta Urduñako zinegotziekin. Talde politikoko hainbat militantek ere hartu zuten parte hitzorduan, eta baita Eva Lopez de Arroyabe batzarkideak ere.
Bertan ondorioztatu zuten Aldundiak sustatutako mahaia "erreminta malgu bat" bilakatu behar dela, "etorkizunaren inguruan hausnartzeko balio behar duena, baina baita ere egun bizi diren arazoei irtenbideak bilatzeko". Horri lotuta, EH Bilduk nabarmendu du ezin zaiela "bizkarra" eman, “unean-unean sortzen diren arazo sozioekonomikoei, hala nola Tubos Reunidoseko 300 kaleratzeei".
Antzeko iritzia plazaratu dute EH Bilduk gobernatutako Udaletako alkateek (Joseba Vivancok, Ainize Gastakak eta Pruden Otegik). Industria mahaia "malgutzea" eskatu dute hiru gobernuburuek, eta "eskualdearen egungo egoera eztabaidan sartzea".
Industria mahaia "malgutzea" eskatu dute baita ere Aiara, Artziniega eta Laudioko alkateek, eta "eskualdearen egungo egoera eztabaidan sartzea"
Industria-lurzorua eztabaidagai
Horrez gain, hiru alkateek hainbat proposamen helarazi dituzte iragan asteko bileran landu zen gaiari lotuta: Industria-lurzorua. Nabarmendu dute "ezinbestekoa" dela eskualde osoko diagnostiko bat egitea, "eskualde-estrategia bat ezarri ahal izateko eta Aiaraldean eskuragarri dagoen lurzoruaren errealitatea ezagutu ahal izateko, lehendik industrializatuta dauden lurzoruen aprobetxamenduari lehentasuna emanez eta degradatuak lehengoratzea sustatuz".
Horri lotuta, "udalaz gaindiko industrialde bat sortzeko aukera" ere jarri dute mahai gainean, eta baita "nekazaritzako industrialde bat sortzea" ere. Era berean, beharrezkotzat jo dute informazioa jasotzea SPRI, Araba Garapenerako Agentzia eta Azpiegiturak bezalako erakunde publikoen partetik, “enpresak erakartzeko eta lurzorua erabiltzeko egin diren ahaleginei eta horretarako dauden baliabideei buruz”.
Dena dela, honakoa ez da industria-lurzoruaren gaia eztabaidara ateratzen den lehen aldia. Izan ere, auzi hori baliatu zuen iaz Ramiro Gonzalez Ahaldun Nagusiak Laudioko Udalaren jarduna kritikatzeko, udalerriko HAPO berrian mota horretako lursail nahikorik aurreikusten ez direla argudiatuta.