Aiaraldea Ekintzen Faktoriak Basa Zikloa hasi zuen larunbatean egun osoko jarduerarekin. Natura, gorputza eta euskara dira egitasmoaren oinarriak eta horretarako ibilaldiarekin ekin zioten egunari. Bidean Azalako Idoia Zabaletak, Ane Zubeldia Magriñáren, Kontra olerki liburuaren irakurketa egin zuen. Parte-hartzaileek euskara eta poesiaren majia isiltasunean entzun, paisaia gozatu eta gorputzak pausatzeko tartea hartu zuten.
Izan ere, isiltasuna erabili zuten irakurtaldian, Zikloaren helburuetako bat baita, gozamenez, sortzaileen egoerari buruz hausnartzea; gorputzen egoera entzutea, euskarak eskaintzen duen balio erantsia sentitzea, naturak eskaintzen dituen baldintzak kontuan hartzea, sortze praktikak bizigarriago egiteko.
Paseoa amaituta, heldu ziren egunaren ekintza garrantzitsuenetako batera, zeinean lokatzean sartu zituzten oinak, eskuak... eta pentsatzeko, jolasteko, esperimentatzeko eta sentitzeko ordu erdi hartu zuten.
Hurrengo ariketa izan zen Garaioneko Amaia Gabilondok eramandako zumezko eraikuntza ezagutzea eta ulertzea nola lantu eta erakitzen den elkarlanean.
Bitartean, Jasone Mitxeltorenak auzolanaren kulturari buruz hitz egin zuen, eta elkarri partekatu zizkieten elkarlanaren inguruko idea eta kezkak. Zer nolako garrantzia duen eta izan duen Auzolanak, zer den eta zer ez den, genero harremanek nola zeharkatzen duten sarritan, taldean lan egitea zein inportantea den, ohitura hori zaintzeko eta mantentzeko premia, nola gaur gaurkoz euskaraz sortzen duen kulturgintzak dituen erronkei erantzuteko tresna baliotsua den, lan eta harreman ereduak bizigarriagoak nola egin ditzaken...
Ariketa bizi horien ostean bazkariaren ordua heldu zen eta indarrak berritu eta gero, Faktoriara jo zuten Lurdes Iriondori buruzko dokumentala ikustera eta euskal erreferentea hobeto ezagutzera eta omentzera.
Ondoren, Amaia Mirandak kontzertu intimoa eta potentea eskaini zuen, euskaraz idatzitako abestiekin eta propio euskaratutako batekin ere. Azkenik, Berba Labanakaz emanaldi punk eta lotsagabea egin zuen itxiera paregabea egiteko.
Zikloa, jakina, ez da amaitu, egonaldiekin eta bestelako deialdiekin jarraituko baitu datozen egunetan.
Argazkiak: Naia Vallejo Torres, Izar Mendiguren Cosgaya, Aitor Aspuru Saez