Renfek tren trafikoa eten du Arrigorriaga eta Bilbo artean uztailaren 4tik 9ra bitartean (bi egun horiek barne). Hori dela medio, konpainia publikoak autobusak kontratatu ditu bidaiariak Arrigorriaga eta Bilbo arteko geltokietara eramateko eta horrek, aldi berean, nabarmen luzatu du ibilbidea betetzeko behar den denbora.
Izan ere, ondorioz, Aiaraldeko herritarrek ordubete behar dute hiriburura joan edo itzultzeko. Esaterako, laudioarrentzat ordubete eta zazpi minutu edota ordubete eta hamabost minutukoa da ibilbidea.
Horren arrazoia da autobusak Basauri eta Bilboko auzunetan barneratu behar direla eta koordinazioa errepideko ibilgailuen eta trenen artean ez dela estua. Bidaiariek 20 minutu eman ditzakete Arrigorriagan itxaroten, adibidez.
Egunero zerbitzua erabiltzen dutenak jadanik egoeraren jakitun izango dira, baina egun hauetan Bizkaiko hiriburura edo Basaurira joan behar dutenek baloratu dezakete ere Orozkotik abiatzen den autobusa hartzea komenigarriagoa zaien. Edonola ere, Bizkaibuseko aukera horrek ez du denbora asko aurrezten (bost edo hamar minutu gehienez).
Nabarmentzekoa da Basaurin obrak hasi baino lehen bidaia luzatu zela hiru minututan, baina lanak abiatu zituztenetik hamar minutu gehiagokoa da ibilaldia, kasurik onenean. Izan ere, ezbeharrak biderkatu dira geroztik.
Hobekuntzak azpiegituran
Ekainaren amaieran jakinarazi zuen Renfek berak azpiegituran hobekuntzak egiteko etengo zuela trafikoa C-3 linean.